မြန်မာတို့၏ဘာသာရေးကျေးဇူးရှင်ဖြစ်သော "အနော်ရထာမင်း"လက်ထက်၌သာသနာတော်
သန့်ရှင်းစင်ကြယ်ရေးအတွက်အာဏာစက်ကိုအသုံးပြု၍
အရေးယူဆောင်ရွက်ခဲ့ပါသည်။
ထိုမင်းလက်ထက်မတိုင်မီက သာသနာတော်သည်
အယူဝါဒမျိုးစုံတို့ဖြင့် အတော်လေး မသန့်မရှင်း ဖြစ်နေ၏။
ထိုစဉ်က
"အနော်ရထာမင်း" သည်
ကိုးကွယ်မှု သန့်စင်ရေးကို ဆောင်ရွက်ရန် ဆန္ဒ
ရှိသော်လည်း
မည်ကဲ့သို့ အရေးယူဆောင်ရွက်ရမည်
ကို မသိဘဲ ဖြစ်နေသည် ဆိုပါ၏။
ပထမဦးစွာ တန္တရ,မန္တရ,အယူအဆ အမှားများ ဖြင့် ပုဂံပြည်သူပြည်သားများကိုလှည့်စားပြီး အညွှန့်အဖူး ခူးစားနေသော "အရည်းကြီး" များကို အာဏာသုံး၊ လူထွက် ခိုင်းပြီး ဘုရင့်အမှုတော် ထမ်းခိုင်းပစ်လိုက်၏။
သာသနာတော် နှင့်မအပ်စပ်သော ယုံကြည်ကိုးကွယ်မှုအားလုံးကိုလည်း တားဆီးမိန့် ထုတ်ပြန်ခဲ့၏။ သာသနာတွင်းသား အတုအယောင်များကို လူဝတ်လဲတန်လဲ၊အပြုအမူ အနေအထိုင် နှင့်ပတ်သက်၍ သတိပေးတန်ပေး လုပ်ခဲ့၏။
သာသနာတော် ကို ဤသို့ သန့်ရှင်းစင်ကြယ်မှုရှိအောင် အရေးယူဆောင်ရွက်ခဲ့ပြီးလျှင် "ရှင်အရဟံ" ကိုယ်တော်မြတ်နှင့် တိုင်ပင်ကာ မြန်မာတစ်နိုင်ငံလုံး သာသနာတော် ပြန့်ပွားအောင် ကြိုးစားဆောင်ရွက်တော်မူ၏။
ဆရာ၊ဒကာ ညီညွှတ်စွာဖြင့် ဆေင်ရွက်ခဲ့သောကြောင့် သာသနာတော် သည်လည်းယနေ့အထိ စည်ပင်ထွန်းကားဆဲပင်ဖြစ်ပါ၏။
သို့သော် အချိန်အခါ ကြာညောင်းလာသည်နှင့်အမျှ သာသနာတော် သည် ရှေးကကဲ့သို့ပင် အတုယောင်ပုဂ္ဂိုလ်များနှင့် ရောထွေးယှက်တင် ဖြစ်လာသည်ကိုလည်း ရံဖန်ရံခါ တွေ့မြင်နေရ၏။
ထို အတုအယောင်များ၏ ရဟန်းကျင့်ဝတ် နှင့်မညီသော အလုပ်များ၊ အပြုအမူများကြောင့် အစစ်အမှန်ကိုးကွယ်သူ ဒါယကာ၊ဒါယကာမများက ယုန်ထင် ကြောင်ထင်ဖြစ်ကုန်ကြတော့၏။
တစ်ခါက ကျွန်တော်သည် အထက်အညာဒေသသို့ ဘုရားဖူးထွက်ခဲ့ပါသည်။
ဘုရားဖူးရန်ပြင်ဆင်နေစဉ်မှာပင် ရဟန်းတစ်ပါး က လက်ယပ်လှမ်းခေါ်သဖြင့် အနားသို့ရောက်သောအခါ "ဦးဇင်း က ဒကာကြီးကို သိလို့ ခေါ်တာမဟုတ်ပါဘူး၊ ပြောစရာရှိလို့ခေါ်တာပါ။ ဦးဇင်း စာသင်ရာမှာသုံးဖို့ စာအုပ်ဖိုးဝတ္ထုငွေ လိုနေတယ်။ တစ်သောင်းလောက် လှူခဲ့ပါ"…..ဟု ဆိုပါ၏။
ထို ရဟန်း၏နေပုံ၊ထိုင်ပုံ၊ပြောပုံ၊ဆိုပုံ ကြည့်ရသည်မှာ အဆင်မပြေလှပါ။ ဒိထက် ရှင်းလင်းအောင်ပြောရလျှင် ထောင့်မကျိုးလှ။
ပါးစပ်တွင် ကွမ်း က တပျစ်ပျစ်၊မျက်လုံး က ဟိုဒီကြည့်ဂနာမငြိမ်၊လက်မောင်းတွင်လည်း ဆေးမှင်ကြောင်ဗလပွ နှင့်။
သူ အလှူခံချိန်တွင် သုံးနှုန်းသည့် စကား နှင့် သူ ပုံသဏ္ဌာန် သည် သဟဇာတ မဖြစ်လှပါ။ အားမနာစတမ်း ပြောလိုက်ရမည် ဆိုပါလျှင် သူ သည် စာသင်သားရဟန်း လုံးဝမဖြစ်နိုင်ပါ။
"အများသူငါထဲမှာမှ တပည့်တော် ကို ခုလို အထင်တကြီးနဲ့ ၀တ္ထုငွေ တစ်သောင်း အလှူခံတာကို ၀မ်းသာပါတယ်ဘုရား။
ဒီ ဘုရားဝင်းအထဲမှာရှိတဲ့လူတွေထဲမှာ "ငွေငါးရာ မပါတဲ့သူ အရင်ဦးဆုံး သတ်မယ်" ဆိုခဲ့ရင် တပည့်တော် ရှေ့ဆုံးက အသတ်ခံရမှာပါ ဘုရာ့။
ဒါဆို အရှင်ဘုရား သဘောပေါက်လောက်ပါပြီနော် ဘုရာ့..။"ဟု ချိုသာစွာ ငြင်းခဲ့ရပါသည်။
တစ်ခါ ကလည်း မြို့ကြီးတစ်မြို့သို့ ခရီးသွားခဲ့ရာ လမ်းတွင် ထမင်းစားနားရန် ခေတ္တ နားကြပါသည်။
ကျွန်တော်တို့ ထမင်းစားမည့် ထမင်းဆိုင်ရှေ့တည့်တည့်(နေပူထဲတွင်) ရဟန်းတစ်ပါး က "ငွေဖလား" တစ်လုံး ကို"သပိတ်"သဖွယ်ပိုက်၍ "သင်္ကန်း"ကို ဖရိုဖရဲ ရုံ ထားကာ "ဂျပန်ဖိနပ်"စီးလျှက် မလှုပ်မယှက် သမာဓိကြီး စွာဖြင့် အလှူခံနေသည်က်ို တွေ့ရပါ၏။
ထိုပုံစံကိုတွေ့မြင်ရသောအခါ ကျွန်တော်၏ ဇာတိမြို့ကလေးဖြစ်သည့်"ဧရာဝတီတိုင်းဒေသကြီး" "မြောင်းမြမြို့"တွင်တည်ရှိသော"ပဇ္ဇောတာရုံကျောင်းတိုက်"
ကိုစတင်တည်ထောင် လှူဒါန်းသူ "၀န်ထောက်ကြီး ဦးစု "ကိုဖျတ်ကနဲ သတိရလိုက်မိပါသည်။
"၀န်ထောက်ကြီး ဦးစု" ဆိုသည်မှာ- "အနည်းငယ်သော အပြစ်ကိုဘေးကြီး ဟုမြင်သူ၊လယ်ယာမြေကောင်းသဖွယ်ဖြစ်သူ၊သီလ၀န္တသိက္ခာကာ မဖြစ်သူ၊ဤကဲ့သို့သော သံဃာတော် ကိုသာ သူ့ကျောင်းတိုက်၏ ကျောင်းထိုင်အဖြစ်ကြည်ညိုမည်" ဟုမျှော်လင့်ခဲ့သော ၊၀ိနည်းတော် ကို အတော်လေး နားလည်တတ်ကျွမ်းသော "ကျောင်းဒကာကြီး တစ်ဦး" ဖြစ်ပါသည်။
(အလျင်းသင့်လျှင် "၀န်ထောက်ကြီးဦးစု" အကြောင်း အား "ကျွန်တော် ဦးစု ဖြစ်ချင်တယ်" ဟူသော အမည်ဖြင့် ဓမ္မဆောင်းပါးတစ်ပုဒ် ရေးသားထားသည် ကို ဆက်လက်တင်ပြ မျှဝေပါမည်။)
ဤနေရာတွင် တမင်္ဂလာ စကားဖြတ်၍ "၀န်ထောက်ကြီးဦးစု" သာသနာပြုပုံလေးတစ်ခု ကို အကျဉ်းမျှ တင်ပြလိုပါသည်။
"၀န်ထောက်ကြီး ဦးစု"သည် မိမိ အိမ်ရှေ့ကြွတော်မူကြသော သံဃာတော် က သင်္ကန်းမရုံ၊ ဖိနပ်စီး၊ ထီးဆောင်း ထားသည်ကိုတွေ့လျှင် လက်အုပ်ချီ ကာ အိမ်ထဲသို့ပင့်သည်။
အိမ်ထဲတွင်ကျနစွာသီတင်းသုံးစေသည်။ထို့နောက်-
"၀ိနည်းတော်မှာ ရဟန်းတော်များ သင်္ကန်းမရုံပဲ မြို့ထဲ၊ရွာထဲ မှာ သွားကောင်းတယ် လို့ ပါ ပါသလားဘုရား။ဖိနပ် စီးကေင်းတယ် လို့လဲ ပါပါသလား ဘုရား" ဟုလျှောက်တော့သည်။
သံဃာတော် က အဖြေကျပ် နေလျှင်
"ဒကာများ ကို သနားငဲ့ညှာသောအားဖြင့် အရှင်ဘုရား က ၀ိနည်းဒေသနာတော် နှင့်အညီ သွားလာ၊နေထိုင်၊ကျင့်သုံးပါရန် ဒကာကြီး က လျှောက်ထား တောင်းပန်ပါသည် ဘုရား"ဟု လျှောက်တတ်ပါ၏။
အထက်ဖော်ပြပါ မြင်ကွင်းမျိုးတွေ့ရသောအခါ ကျွန်တော်သည် "၀န်ထောက်ကြီး ဦးစု "ကိုဖျတ်ကနဲ သတိရလိုက်မိပါသည် ဟု ရေးလိုက်မိခြင်းဖြစ်ပါသည်။
တစ်ခါကလည်း မြို့ကြီးတစ်မြို့၏ အဝေးပြေး(EXPERSS) ကား မထွက်မီအချိန်တွင်ဖြစ်ပါသည်။မသပ်မရပ် သင်္ကန်းဝတ်ထားသော ကိုယ်တော်တစ်ပါး လက်တစ်ဖက်က စာအိပ်များကိုင်ပြီး ကား ပေါ်တက်လာပါ၏။
ကားပေါ်သို့ရောက်သောအခါ ကားပေါ်မှ ခရီးသည်များကို တစ်ချက်မျှ အကဲခတ်သလို ဝှေ့ကြည့်လိုက်ပြီး စာအိပ်များ လိုက်လံဝေငှပါလေတော့၏။
စာအိပ်ထဲမှ စာရွက် တွင်ရေးထားသည်က"ဆွမ်းအတွက် အခက်အခဲဖြစ်နေပါသဖြင့် စွမ်းနိုင်သမျှ လှူဒါန်းနိုင်ပါသည်" ဟူ၏။
ကျွန်တော့်ဘေးတွင် နေရာယူထိုင်လျှက်ရှိသော ခရီးသွား လူငယ်တစ်ဦးက "ဒါ ဘာလုပ်တာလဲဟင်"ဟုမေးရှာပါ၏။
"အတုအယောင်တွေ ဂွင်ဖန်တာပေါ့ကွယ်။ စာအိတ် ကို ဒီအတိုင်းပြန်ပေးလိုက်ပါ။ ရပါတယ်"ဟု ကျွန်တော် ပြန်ပြောလိုက်ပါသည်။
"အလှူ" ကိုပိတ်ပင်သည် မဟုတ်ပါ။ "အဆိပ်ပင် ကိုရေလောင်း"သလိုဖြစ်မှာစိုးသောကြောင့် "ခေတ္တ ၀န်ထောက်ကြီး ဦးစု"လုပ်လိုက်မိခြင်းဖြစ်ပါသည်။
ထိုကဲ့သို့အလုပ်မျိုးကို "ရဟန်းသိက္ခာ လေးစားစောင့်ထိန်းသော"၊ "မိမိ ဘာသာ ကို အခြားသော ဘာသာခြားတို့ အထင်သေးမှာ ကိုအင်မတန်စိုးရိမ်သော ရဟန်းကောင်း၊ရဟန်းမြတ်" တို့ မည်သည့်အခါမျှ မလုပ်ပါ။
မစားရလို့ လျှာပေါ်မြက်ပေါက်ချင်ပေါက်ပါစေ ဒါမျိုးကိုတော့ အလွန်အကြူး အထူးသဖြင့်ရှောင်ကြဉ်တော်မူကြသည်ကို ကျွန်တော် သိရှိပြီးဖြစ်ပါသည်။
ထိုကဲ့သို့ တွေ့ကရာလက်ဖက်ရည်ဆိုင်၊ ဈေးဆိုင်၊ကားဂိတ်၊
သင်္ဘောဆိပ်၊ဘူတာ၊လမ်းဘေးပလက်ဖောင်းများ၌ အလှူခံသော "သင်္ကန်းဝတ် အချောင်သမား" (ရဟန်း၊လူ၊သီလရှင်၊ငွေဖလားကိုင် ကော်မရှင်စား အားလုံးအပါအ၀င်) တို့သည် နတ်သဒ္ဓါ ထဲ လာရောနေကြသည့် မစင် များပင်ဖြစ်ပါသည်။
(အပြောရိုင်းသည်ဟု မထင်စေချင်ပါ။ပြောစရာ စကားက ဒါပဲရှိတော့၍ဖြစ်ပါသည်။)
"သမီး တစ်ယောက် ရည်းစား ထားတာကို တစ်ရပ်ကွက်လုံးသိပြီး,နောက်ဆုံးမှ သိရတာဟာမိဘပဲ" ဟူသည့်စကားကဲ့သို့ ထိုကဲ့သို့ကိစ္စမျိုးကို သက်ဆိုင်ရာ က ချက်ချင်း မသိကြ။
ချစ်လှစွာသော သက်ဆိုင်ရာတို့ကလည်း လူပြော သူပြောများမှ ရံဖန်ရံခါ အရေးယူတတ်ကြ၏။ သိပ်အားကိုး၍မရပါ။
မြန်မာ ဟူသည်က ဉာဏ်ရည်ရော၊ လူရည်ရော၊ ဂုဏ်ရည် ပါ မညံ့တဲ့လူမျိုးဟုယုံကြည်ပါသည်။
ယခုအချိန်အခါလို နိုင်ငံခြားသားများ ဥဒဟို ၀င်ထွက်နေသော အချိန်ကာလတွင် ထိုကဲ့သို့သော မအပ်စပ်သည့်နည်းဖြင့် "အလှူခံခြင်း" ပြုနေမှုသည် "သာသနာလည်းညှိုးနွမ်း" ။ "လူမျိုး ဂုဏ်သိက္ခာလည်း ထိခိုက်" လွန်းလှပါ၏။
ကျွန်တော့် ဓမ္မဆောင်းပါးကလေး ကို နိဂုံးချုပ် ပါမည်။
လွန်ခဲ့သော နှစ်ပေါင်းလေးငါးဆယ် ခန့်က ထွက်ရှိခဲ့ဖူးသော "ကာနယ်ဇင်း"အမည်ရ မဂ္ဂဇင်းဟောင်းတစ်အုပ် တွင် လစဉ်နီးပါး ပါလေ့ရှိသော ကြော်ငြာ တစ်ခု ရှိပါသည်။
"ရေနံဆီမီးဖို" သုံးသော ခေတ်ကာလ ဖြစ်သဖြင့် "ရေနံဆီ မီးဖို ပြုပြင်ပေးသည်"ဆိုသည့် ကြော်ငြာမျိုးဖြစ်ပါသည်။
တစ်ခြား ကြော်ငြာများနှင့်မတူ၊ တမူထူးခြားနေသဖြင့် ကျွန်တော် မှတ်မိနေခြင်းဖြစ်ပါသည်။
ကြော်ငြာပုံလေးက-
"မီးဖိုပျက်လို့ ပစ်ထားရင်
ကျွန်တော် အားကြီး စိတ်ဆိုးတယ်..။
ဗွီစတာ ဗွီးရှင်း
မီးဖိုပြင်ဆိုင်"……………ဟူ၏။
ယခုလည်း "သာသနာ့မျက်နှာ"ကိုမထောက်ပဲ-
"မအပ်စပ်သည့်နည်းများ နဲ့ အလှူခံခြင်းကိစ္စများ ပြုနေကြပါရင်..
ကျွန်တော် အားကြီး စိတ်ဆိုးတယ်..။
ဗွီစတာ ဗွီးရှင်း
မောင်ဉာဏ်.."……………………ဟု ဤသို့ပင် ပြောလိုက်ရတော့မည်ထင်ပါသည်။
ချမ်းသာပါကြစေ..၊အေးငြိမ်းပါကြစေ..၊
သံသရာဝဋ်ဆင်းရဲမှ..လွတ်မြောက်နိုင်ကြပါစေ။
ဘ၀တုသဗ္ဗမင်္ဂလံ
ဉာဏ်လင်းမြို့ရေးသားသောပို့မှ ကူးယူမျှဝေသည်။
No comments:
Post a Comment