ပစလာယနသုတ်
ငိုက်လို့ရှိရင် အငိုက်ဖျောက်ပုံနည်းလမ်း (၇)သွယ် ဒီသုတ္တန်မှာ
မြတ်စွာဘုရားက ဟောတယ်။ ပစလာယနသုတ်လို့ ခေါ်တယ်။ ပစလာယနဆိုတာ
အိပ်ငိုက်ခြင်းဆိုတဲ့ အဓိပ္ပာယ်၊ ခေါင်းတဆက်ဆက်နဲ့ ငိုက်တယ်။
ကမ္မဋ္ဌာန်းအားထုတ်တဲ့ အချိန်မှာ အိပ်ချင်လာတယ် ဆိုရင် အဲဒီ ကမ္မဋ္ဌာန်းကိုစွန့်၊
တခြားနည်းပြောင်း အားထုတ်ရတယ် ဒီလိုပြောတယ်။ အိပ်ငိုက်တဲ့
အမှတ်သညာမျိုးကို ဖယ်ရှားပစ်ရမယ်တဲ့။
*နံပါတ် (၁) က တရားကို နှလုံးသွင်းလို့ အိပ်ငိုက်တယ် ဆိုလို့ရှိရင် အဲဒီ အိပ်ငိုက်စေတတ်တဲ့ အမှတ်သညာ တစ်မျိုးကို ရပ်ထားလိုက်ပါတဲ့။ အာရုံပြောင်းပြီးရှုပါတဲ့။
*နံပါတ် (၂) အဲဒီလိုရှုလို့ အိပ်ငိုက်မပြေသေးဘူးဆိုရင် နောက်ထပ်တစ်ခု ပြောင်းလုပ်ရမယ်။ ဘာလဲဆိုတော့ ကိုယ်အာဂုံဆောင်ထားတဲ့ တရားဓမ္မတွေ သင်ထားတဲ့ တရားဓမ္မတွေ ကို စိတ်ထဲက တွေးပါတဲ့။ ဥပမာ- ပရိတ်ကြီးရရင် ပရိတ်ကြီးပေါ့၊ နှုတ်နဲ့ထုတ်ရွတ်ဆိုတာ မဟုတ်ဘူး။ စိတ်နဲ့ကြံတွေးပြီး ရွတ်ဆိုကြည့်တာပေါ့၊ အဲဒီလိုဆိုရင် အိပ်ငိုက်မှုဟာပျောက်သွားနို
*နံပါတ် (၃) ရတဲ့စာတွေ တွေးနေတာမှ အိပ်ငိုက်မှုက မပျောက်သေးဘူး၊ အိပ်ချင်နေသေးတုန်းပဲ ဆိုရင် ကိုယ်နှုတ်တက် အာဂုံဆောင်ထားတဲ့ စာတွေကို ရွတ်ဖတ် သရဇ္ဈယ်လိုက်ပါတဲ့၊ ''ဣတိပိသော'' ပဲ ဖြစ်ဖြစ်၊ ဘာပဲဖြစ်ဖြစ် ရွတ်ဖတ် သရဇ္ဈယ်လိုက်၊ အသံထုတ်ပြီး အဲဒီလို ရွတ်ဖတ်သရဇ္ဈယ် ပြီးလို့ရှိရင် အိပ်ငိုက်မှုဟာ ပျောက်သွားနိုင်တယ်တဲ့။
*နံပါတ် (၄) မပျောက်ဘူးဆိုရင် ဘာဆက်လုပ်ဖို့ လိုတုန်းဆိုရင် ကိုယ့်နားရွက်ကို ပူသွားအောင်ဆွဲတဲ့၊ ခန္ဓာကိုယ်ကို တစ်ကိုယ်လုံးပွတ်သပ်တဲ့၊ အညောင်းအညာတွေဖြေ၊ နားရွက်ဆွဲ တစ်ကိုယ်လုံးပွတ်သပ် အဲဒီလို လုပ်လိုက်လို့ရှိရင် လူဟာလန်းဆန်းပြီးတော့ အိပ်ချင်ပြေသွားနိုင်တယ်တဲ့
*နံပါတ် (၅) အဲဒီလိုလုပ်မှ မပြေဘူးဆိုရင် ဘာလုပ်ရမလဲ။ မျက်နှာသစ်၊ မျက်လုံးကိုရေဆွတ်တဲ့။ မျက်လုံးကို ရေဆွတ်ပြီး ကမ္မဋ္ဌာန်းကျောင်းထဲကထွက် ကောင်းကင်ကိုကြည့်၊ နက္ခတ်တွေရှိရင် နက္ခတ်တွေကြည့်၊ လ ရှိရင် လ ကြည့်ပေါ့။ ကောင်းကင်ကို မော့ကြည့် ဟိုကြည့် ဒီကြည့် အရပ်မျက်နှာတွေကိုကြည့်၊ လေကောင်းလေသန့်တွေကိုရှူ၊ အရပ်မျက်နှာတွေကို မော့ကြည့်လိုက်တဲ့အခါ အိပ်ချင်ပြေသွားနိုင်တယ်ပေါ
*နံပါတ် (၆) အဲဒီလိုမှ မရဘူး။ ဆက်ပြီး အိပ်ချင် နေသေးတယ်ဆိုလို့ရှိရင် အာလောကသညာ အလင်းကိုနှလုံးသွင်းရမယ်တဲ့
*နံပါတ် (၇) အဲဒီလိုမှ မပျောက်သေးဘူး ဆိုလို့ရှိရင် စင်္ကြန်လမ်းလေးကို သတ်မှတ်ပြီး သဒ္ဓါတို့၊ ဝီရိယတို့၊ သတိတို့၊ သမာဓိတို့၊ ပညာဆိုတဲ့ ဣနြေ္ဒစွမ်းအားတွေကို ထိန်းချုပ်ထားပြီး စင်္ကြန်လျှောက်လိုက်ပါတဲ့။
အဲဒီလို စင်္ကြန်လျှောက်တာတောင် အိပ်ချင်တာက မပြေသေးဘူးဆိုရင်တော့ ဘာလုပ်ရမတုန်း၊ အိပ်လိုက်တော့တဲ့။ နောက်ဆုံးကျတော့ အိပ်ချင်မပြေရင် အိပ်ရတယ်။ မြတ်စွာဘုရားက အငိုက်ဖျောက်ပုံ နည်းလမ်းခုနစ်သွယ် ပေးထားတာ။ မရဘူးဆိုရင် အိပ်တဲ့။
အိပ်ရင်လည်း စနစ်တကျ အိပ်ရမယ်။ဘယ်လို စနစ်တကျ အိပ်ရမတုန်းဆိုရင် လက်ယာဘက်ကို စောင်းအိပ်၊ ခြေထောက်နှစ်ခု ခြေမျက်စိချင်း
မထိစေနဲ့တဲ့၊
ပဲခူးရောက်လို့ရှိရင် ရွှေသာလျောင်းဘုရားကို သွားဖူးကြည့်။ ခြေဖဝါးနှစ်ခုဟာ တညီတည်းထားလို့ရှိရင် စာနဲ့မညီဘူး။ ခြေဖဝါး နှစ်ခုက တစ်ဖက်အတို တစ်ဖက်အရှည်ထားပြီး ခြေမျက်စိချင်းမထိအောင် ထားရမှာ။ ရွှေသာလျောင်းဘုရားတွေမှာ စနစ်တကျထုရင် အောက်ခြေထောက်ပေါ် အထက်ခြေထောက်က ဒူးကွေးထား။ ခြေမျက်စိချင်း မထိဘူး။ ဒါစာနဲ့ အညီ လက်ယာခြေပေါ်မှာ လက်ဝဲခြေထောက်ကလေး တင်ပြီး "ဥဋ္ဌာနသညံ မနသိကတွာ" တဲ့၊ ဘယ်အချိန်ထမယ်ဆိုတာ အမှတ်သညာလေးထားပြီး အိပ်ပါတဲ့၊ မြတ်စွာဘုရားက စနစ်တကျ အိပ်ခိုင်းတယ်။
နိုးလာတာနဲ့ တပြိုင်နက် ချက်ချင်းထတဲ့၊ ဇိမ်ခံ မနေနဲ့။ လူတွေက အိပ်ပြီးလို့ရှိရင် နိုးလားပေမယ့် တော်ရုံနဲ့ မထသေးဘူး၊ မှေးနေသေးတယ်၊ ဇိမ်ခံတာ ခေါ်တယ်၊ ''သေယျသုခ'' အိပ်ခြင်းကြောင့် ဖြစ်တဲ့ချမ်းသာ၊ ''ပဿသုခ'' ဟိုဘက်စောင်းလိုက် ဒီဘက်စောင်းလိုက် (ကလေးတွေဆို နိုးလည်း တော်ရုံနဲ့ မထဘူး။ ဇိမ်ခံနေတာ) အဲဒီ အိပ်ရတာက ဇိမ်တစ်မျိုး၊ အိပ်ယာထဲ မှေးနေရတဲ့ ဇိမ်က တစ်မျိုးနဲ့တူတယ်။ အားလုံးဒီဇိမ်တော့ ရဖူးကြမှာပါ။ အဲဒါကို ''သေယျသုခ၊ ပဿသုခ၊ မိဒ္ဒသုခ'' တဲ့။ အဲဒီလို ဇိမ်ခံမနေနဲ့တဲ့၊ ချက်ချင်းထတဲ့။ ဖျက်ကနဲနိုးလိုက်တာနဲ့ လူးလဲထ၊ ထပြီးတော့ တရားအားထုတ်ပါတဲ့။
အရှင်မောဂ္ဂလာန်ကို မြတ်စွာဘုရားက နည်းလမ်းတွေ ပေးတာ၊ ဒါကမ္မဋ္ဌာန်းအားထုတ်တဲ့ ပုဂ္ဂိုလ်တွေ အိပ်ချင်ပြီဆိုရင် ဒီနည်းစနစ်ကို လိုက်နာကျင့်သုံးရမှာပါ။ အင်္ဂုတ္တရနိကာယ် ပစလာယနသုတ္တန် ဆိုတာ ရှိတယ်၊ ခုနစ်ချက်ပေးထားတာ ဖြစ်သောကြောင့် (သတ္တကနိပါတ်) အချက်ခုနစ်မျိုးပါတဲ့ အပိုင်းကဏ္ဍမှာ ဒါကို ဖော်ပြထားတယ်။
အဂ္ဂမဟာ ပဏ္ဍိတ အရှင်နန္ဒမာလာဘိဝံသ(Ph.D)
No comments:
Post a Comment