ယနေ့ခေတ်၌ ဘုန်းကြီးကျောင်းဝင်းအတွင်း ဖိနပ်စီးခြင်းနှင့်ပတ်သက်၍ စီးသင့်/မစီးသင့် ဦးဇင်းအမြင်နဲ့ ဖြေကြားပေးပါလို့ ခဏခဏ လျှောက်ထားကြတဲ့အတွက် ဦးဇင်းလေ့လာမိသမျှကိုထောက်ဆပြီး ဖြေကြားပေးပါမယ်။ ဤကဲ့သို့ ဖြေကြားရာ၌ ကိုယ်ပိုင်အယူအဆကိုလည်း ထည့်သွင်းပြီး ဖြေကြားသွားမှာဖြစ်ပါတယ်။
သာသနာ့နယ်မြေမှာ ဖိနပ်စီးမှုနဲ့ပတ်သက်ပြီး အများစုက ဗမ္ဗီသာရမင်းကြီးကို ဥပမာပေးပြီး ပြောလေ့ရှိကြပါတယ်။ မှန်ပါတယ်။ ဗိမ္ဗိသာရမင်းကြီးဟာ အတိတ်ဘ၀တစ်ခုမှာ သံဃာတော်တွေအတွက် ခင်းထားခဲ့တဲ့အခင်းကို ခြေမဆေးပဲတက်ခဲ့တဲ့အတွက် ပစ္စုပ္ပန်ဘ၀မှာ ခြေဖ၀ါးကို ဓားခွဲပြီး ဆားသိပ်ခံရခြင်းဆိုတဲ့ အကျိုးဆက်ကို ရရှိခဲ့ပါတယ်။
သို့သော် ဤနေရာ၌ အထူးမှတ်သားသင့်သောစကားလုံးမှာ သီလက္ခန္ဓ, အဘိန၀ဋီကာမှာပါတဲ့ “မနောပဒေါသ”ဆိုတဲ့ စကားလုံးပါပဲ။
အဓိပ္ပါယ်က “ပြစ်မှားလိုစိတ်ရှိခြင်း”တဲ့။ ဒီလိုဆို တစ်ချို့ကပြောမယ် “တပည့်တော်တို့က ပြစ်မှားလိုတဲ့စိတ်မရှိတဲ့အတွက် အပြစ်မရှိဘူးပေါ့ဘုရား”လို့။ ဒီလိုအယူအဆရှိသူတွေအတွက် ဘုရားရှင်လက်ထက်က သူတော်ကောင်းတွေ ဘုရားဆီ သွားပုံသွားနည်းကို ထောက်ဆပြီး ဖြေပေးပါမယ်။
ဆေးဆရာဇီဝကရဲ့ တိုက်တွန်းမှုကြောင့် အဇာတသတ်မင်းကြီး ဘုရားရှင်ဆီကို သွားစဉ်အခါတုန်းက ဆင်ဖြူတော်ကိုစီးပြီး အခြံအရံပရိသတ်များစွာရဲ့ အစောင့်အရှောက်နဲ့ နန်းတော်ကနေ စတင်ထွက်ခွါခဲ့ပါတယ်။
ကျောင်းမုခ်ဦးရောက်တဲ့အခါ အခြွေအရံတွေကိုထားပြီး ကိုယ်တိုင်လည်း ဆင်ပေါ်ကဆင်းကာ ခြေလျင်လျှောက်ပြီး ဘုရားရှင်နဲ့သံဃာတော်တွေ သီတင်းသုံးနေတဲ့ တရားဟောမဏ္ဍပ်ဆီသွားခဲ့ပါတယ်…။
ဒီနေရာ ရှင်ဘုရင်ကြီးဟာ ဒီနေ့ခေတ် ကျောင်းထဲကို ကားမောင်းဝင်သလိုမျိုး ဆင်စီးပြီး ကျောင်းထဲဝင်သွားတာ မဟုတ်ပါဘူး။
သို့သော် ဒီနေ့ခေတ် ဒကာ,ဒကာမတွေ ကျောင်းထဲကို ကားမောင်းဝင်တယ်ဆိုတာကလည်း ကားကို ကျောင်းအပြင်မှာထားခဲ့ရင် တစ်ခုခုဖြစ်နိုင်တာရယ် ကျောင်းဝင်းထဲမှာ ကားရပ်ဖို့နေရာသီးသန့်ရှိတာရယ်ကြောင့် မဖြစ်မနေ မောင်းဝင်ရတာလို့ပဲ သတ်မှတ်ရပါမယ်။ ဟုတ်တယ်, တော်ကြာ ကုသိုလ်လိုချင်လို့ ကျောင်းကိုလာပြီး ကားတစ်ခုခုဖြစ်လို့ အကုသိုလ်နဲ့ပြန်သွားရတယ်ဆို ဘယ်သဘာဝကျပါ့မလဲ။
နောက်တစ်ခု သာဓကထုတ်ပြလိုတာက ကောသလမင်းကြီး-ပါပဲ။
ကောသလမင်းကြီးဟာ ဘုရားရှင်ကို ဖူးမြင်ဖို့သွားတဲ့အခါ မင်းမြောက်တန်ဆာ ငါးပါးကိုတောင် ၀တ်မသွားပါဘူး။ ပါလာတဲ့ မူးမတ်တွေဆီမှာ ချပ်ဝတ်တန်ဆာတွေ ထားခဲ့ပြီး ရိုးရိုးသာမန်အနေနဲ့ပဲ ဘုရားရှင်ဆီကို သွားလေ့ရှိပါတယ်။ ဒါဟာ သူတော်ကောင်းတွေ ဘုရားရှင်ဆီသွားကြတဲ့ ပုံစံတွေပါပဲ။
တစ်ခါတုန်းက ဒီဖိနပ်ပြဿနာနဲ့ပတ်သက်ပြီး အတန်းထဲမှာ ဆွေးနွေးကြတဲ့အခါ အမြင်အမျိုးမျိုး တင်ပြကြပါတယ်။
ဆရာဘုန်းကြီးက “ဦးပဏ္ဍိရော ဘယ်လိုမြင်လဲ…၊ အရှင်ဘုရားအမြင်လည်း ပြောစမ်းပါဦး”လို့မိန့်တော့ “ဒီပြဿနာက တစ်ကိုယ်ရည်အမြင်နဲ့ ဖြေရခက်တယ်ဘုရား…၊ ကျောင်းဝင်းထဲကို ဖိနပ်စီးဝင်လို့ အပြစ်ရှိ/မရှိဆိုတာ တမလွန်ကျမှ ရှင်းကြတာပေါ့ဘုရား။”လို့။
နောက်တစ်ခု ဒီနေရာမှာ နှလုံးသွင်းစိတ်ထားလေးတစ်ခု ပြောချင်ပါသေးတယ်။ ကဿပဘုရားရှင် လက်ထက်တော်အခါတုန်းက ခရီးသွားတစ်ယောက်က ခရီးလှည့်လည်ရင်း နေပူထဲမှာတည်ထားတဲ့ ရုပ်ပွားတော်တစ်ဆူကို တွေ့တဲ့အခါ ရုပ်ပွားတော်ကို နေရောင်ကျနေတာကို မကြည့်ရက်တာနဲ့ အပူဒဏ်မှ သက်သာပါစေ-ဆိုတဲ့ စိတ်ထားနဲ့ ဖိနပ်ကို ရုပ်ပွားတော်ခေါင်းပေါ်တင်ခဲ့ပါတယ်။
နောက်ခရီသွားတစ်ယောက် လာတဲ့အခါ ရုပ်ပွားတော်ခေါင်းပေါ်က ဖိနပ်ကိုကြည့်ပြီး အမြင်မတော်တာကြောင့် လွင့်ပစ်လိုက်ပါတယ်။ သေလွန်တဲ့အခါ နှစ်ယောက်လုံး နတ်ပြည်၌ ဖြစ်ရပါတယ်…။ စိတ်ထားလေးပါပဲ။
သာသနာ့နယ်မြေနဲ့ ဖိနပ်ပြဿနာဟာ ဒီနေ့ခေတ်မှာ မဟုတ်ဘူး။
ကိုလိုနီခေတ်တုန်းကလည်း ရွှေတိဂုံဘုရားပေါ်ကို အင်္ဂလိပ်တွေ ဖိနပ်နဲ့တက်လို့ ပြည်သူတွေရဲ့ ငြိုငြင်မှုကို ခံခဲ့ရပါတယ်။ တစ်ချို့ကလည်း ဆန္ဒပြကြပါတယ်။ ဒီလိုဖိနပ်တိုက်ပွဲ အပြင်းအထန်ဆင်နွှဲလို့ ဦးသိန်းမောင်-ဟာ “ဖိနပ်သိန်းမောင်”ဆိုတဲ့ ဂုဏ်ထူးဝိသေသကို ရရှိခဲ့ပါတယ်။ လေးစားစရာ စိတ်ထားရှိသူပါပဲ။
နောက်တစ်ခုက စေတီရင်ပြင်ပေါ်ကို ဖိနပ်စီးတက်မှ မဟုတ်ပါဘူး။ မရိုသေတဲ့စိတ်နဲ့ဆို ထီးဆောင်းပြီးတက်ခြင်း၊ ဦးထုပ်ဆောင်းပြီး တက်ခြင်းဟာလည်း အဂါရ၀မြောက်ပါတယ်။ ဒါဆို အတွဲတွေကျတော့ ဘယ်လိုလုပ်မလဲ…မေးရင်တော့ သူတို့လည်း ခြင်ထောင်ထဲကကိစ္စ ဘုရားပေါ်မှာအသုံးချတဲ့အကျိုးကို တမလွန်ကျမှ အတိုးချပြီး ပေးဆပ်ကြပါလိမ့်မယ်-ပေါ့။
ပြီးတော့ အခုလို မိုးရာသီမှာ ဘုန်းကြီးကျောင်းတွေသွားတဲ့အခါ ဖိနစ်စီးပြီး ကျောင်းထဲမ၀င်ရင် ကျောင်းပေါ်တက်တဲ့အခါ ရွှံ့တွေပေမှာပေါ့-လို့ စောဒက တက်တဲ့သူတွေလည်း ရှိတယ်။ ဒီပြဿနာကို ဖြေရှင်းဖို့ မြတ်ဗုဒ္ဓ မိန့်တော်မူထားတာရှိတယ်။
မြတ်စွာဘုရားက ကျောင်းဆောင်တွေရဲ့ လှေကားထစ်နေရာမှာ
ခြေဆေးရေထားဖို့ မိန့်တော်မူထားတာ ရှိတယ်။ ဟုတ်တယ်, ရွှံ့ပေနေရင် ခြေဆေးလိုက် ပိုတောင် အဆင်ပြေသေးတယ်။ ဒါဆို ခြေဆေးရေကရောဘယ်သူခပ်မလဲ-ပေါ့။
ကျောင်းတွေမှာ ရေကန်တွေရှိကြပါတယ်။ အဲဒီကနေ ကိုယ့်ဘာသာခပ်ပေါ့။ ဝေယျာဝစ္စကုသိုလ်တောင် အဆစ်ရသေးတယ်။
ကျောင်းဝင်းအတွင်းစီးတာက တော်သေးတယ်။ တစ်ချို့က ဆရာတော်တွေရဲ့ ခွင့်ပြုချက်ရတယ်ဆိုပြီး အလွှာတွေပေါ်မှာစီးတာတောင် တွေ့မြင်နေရတယ်။ ငရဲကျရင် ဆရာတော်တွေက လိုက်ပြီး ရှေ့နေလုပ်ပေးမှာမဟုတ်ဘူး။
ကိုယ့်ဘာသာ သွားရမှာ။ သူ့ခွင့်ပြုချက် ရသည်ဖြစ်စေ မရသည်ဖြစ်စေ အကောင်းဆုံးကတော့ ကိုယ့်ဘာသာ ဆင်ခြင်လိုက်ပြီး အပြစ်နည်းအောင် နေထိုင်မှသာ ကုသိုလ်သွားယူတဲ့အခါ ကုသိုလ်ပိုက်ပြီး ပြန်လာနိုင်မှာ ဖြစ်ပါတယ်။ ဒီလိုမှမဟုတ်ရင် ကုသိုလ်သွားယူပြီးအကုသိုလ်တွေ ပြန်သယ်လာရတာမျိုး ဖြစ်တတ်တယ်။
အချုပ်ဆိုရပါမူ- ကျောင်းဝင်းအတွင်း ဖိနပ်စီးသင့်/မစီးသင့်ကို ဓမ္မမိတ်ဆွေများ ကိုယ်ပိုင်ဥာဏ်ဖြင့် ဆုံးဖြတ်ကြပါ။ အဲ…. မလုပ်သင့်တာကို လုပ်မိရင်တော့ အပြစ်က မီးလိုပဲ။ “မီးဆိုတာ သိလို့ပဲကိုင်ကိုင်,မသိလို့ပဲကိုင်ကိုင် ပူစေတတ်သလို အပြစ်ကလည်း သိလို့ကျူးလွန်သည်ဖြစ်စေ မသိလို့ကျူးလွန်သည်ဖြစ်စေ အနည်းနဲ့အများတော့ ဆိုးကျိုးကို ဖြစ်စေနိုင်တယ်”။
(ပို့စ်အဖြစ် ရေးသာတင်ပြရခြင်းဖြစ်သည့်အတွက် လိုအပ်ချက်များ ပါရှိပါက နားလည်မှုရှေ့ထား၍ ဖြည့်စွက်ဖတ်ရှုပေးကြပါရန်…)
ဓမ္မမိတ်ဆွေများ- မှန်ကန်သောလမ်းစဉ်ဖြင့် လွယ်ကူချမ်းသာစွာ နိဗ္ဗာန်နန်းဆီကို လျှောက်လှမ်းနိုင်ကြပါစေ….။
အရှင်ပဏ္ဍိတ(ဒေါင်းဖြူ)
No comments:
Post a Comment