လောဘကိုနိုင်လျှင် လောကကိုနိုင်လေသည်။

 

** ရောဂါတစ်ခုခု ဖြစ်နေသူသည် သူ့လူမျိုးဖော်စပ်သောဆေး မဟုတ်သောကြောင့် -
အခြားလူမျိုးဖော်စပ်သော ဆေးကောင်းကို တွေ့သော်လည်း မသောက်ဘူးဆိုလျှင် ရောဂါမပျောက်ရုံသာဖြစ်၏။ ထို့အတူ ဝိပဿနာတရားကို မိမိတို့ကိုးကွယ်သော ဘုရားက ပြသောတရားမဟုတ်၍ " မကျင့်နိုင်ဟု " ဆိုလျှင် ကိလေသာရောဂါ မပျောက်ရုံသာဖြစ်၏။

** ခွေးငယ်ကလေးများသည် အဝတ်စ စက္ကူစကို တွေ့သောအခါ အတူတကွ ဆွဲလွဲပြီး ပျော်ရွှင်စွာ ကစားတတ်ကြသော်လည်း အမဲရိုးကိုတွေ့သောအခါ တစ်ကောင်နှင့် တစ်ကောင်မာန်ဖီပြီး အသေကိုက်ကြတော့သည်။ ထို့အတူ လောဘ၏ကျေးကျွန် ဖြစ်ကြရသော "ရဟန်း,ရှင်,လူ " အချို့တို့သည် ဆွမ်း သင်္ကန်းစသော ပစ္စည်းအသေးအဖွဲ့နှင့် ပတ်သက်သောအခါတွင် ချစ်ခင်ရင်းနှီးစွာ မျှတသုံးဆောင်တတ်ကြသော်လည်း "ကျောင်း အိမ် နေရာ" တို့နှင့် ပတ်သက်လာလျှင်ကား ခိုက်ရန်ဖြစ်ပွားပြီး အသေအကြေ လုယက်တိုက်ခိုက် ကြတော့သည်။

** မြင့်မြတ်သောစိတ် ဟူသည်မှာ ကုသိုလ်ပြုရာ၌ ပစ္စက္ခသံသရာ ငါကောင်းစားရေးကို ဦးစားမပေးဘဲ သူတစ်ပါးကောင်းစားရေးကိုသာ အဓိကထားခြင်းဖြစ်သည်။ ပါရမီထိုက်သော ကုသိုလ်ဖြစ်မှ လောဘကိုလည်း ကုန်စေသည် နိဗ္ဗာန်နှင့်လည်း မြန်မြန်နီးစေသည်။

** မိမိအတွက် ရသမျှနှင့် ရောင့်ရဲနိုင်ခြင်းသည် ပထမအဆင့်ဖြစ်၏။ ပိုသောပစ္စည်းသည် လောကအတွက်ဖြစ်၏။ မိမိအတွက် ရသမျှထဲမှ မိမိအတွက် လုံလောက်ရုံမျှနှင့် ရောင့်ရဲနိုင်ခြင်းသည် ဒုတိယအဆင့်ဖြစ်၏။ ထိုအထဲမှ မိမိအဆင့်နှင့် လိုက်ဖက်ညီရုံနှင့် ရောင့်ရဲနိုင်ခြင်းသည် တတိယအဆင့်ဖြစ်၏။ ထိုအခါ ကိုယ်ကျင့်တရားဆိုင်ရာ သီလသိက္ခာသည် ပြည့်စုံပြီးသားဖြစ်လာသည်။ သီလသိက္ခာပြည့်စုံလျှင် သမာဓိလည်းပြည့်စုံသည်။ သမာဓိသိက္ခာပြည့်စုံလျှင် ပညာသိက္ခာပြည့်စုံရန် မခက်ခဲ သိက္ခာသုံးပါးပြည့်စုံသည်နှင့်အမျှ တပ်မက်မှု လောဘကိုနိုင်၏။

လောဘကိုနိုင်လျှင် လောကကိုနိုင်လေသည်။ *****************************

ပန်းဒကာကိုတင်မြင့်

(မေတ္တာရှင် ရွှေပြည်သာ)

 

 အားလုံး ကျန်းမာ ချမ်းသာပါစေ....။
ဓမ္မစာပေများ တစ်ဆင့်မျှဝေပူဇော်ခြင်းဖြင့် ကုသိုလ်ပွားများနိုင်ကြပါစေသော်ဝ်......။