☼ “ဘုရားရှင်တို့၏ စကားတော်ဟူသည်” ☼
☼ ရဟန်းတို့ ...အကြင်ညဥ့်၌လည်း တထာဂတ အမည်ရတော်မူသော သင်တို့ဆရာ
ငါဘုရားသည် အတုမရှိသော အရဟတ္တမဂ်ဉာဏ် သဗ္ဗညုတဉာဏ်ဟု ခေါ်ဆိုအပ်
သော သမ္မာသမ္ဗောဓိဉာဏ်တော်မြတ်ကို ထိုးထွင်းသိမြင်တော်မူ၏။
☼ အကြင်ညဥ့်၌လည်း ခန္ဓာငါးပါးတို့၏ နောင်တစ်ဖန်မဖြစ်သော ချုပ်ငြိမ်းခြင်းဟု ခေါ်
ဆိုအပ်သော အနုပါဒိသေသနိဗ္ဗာနဓာတ်ဖြင့် ပရိနိဗ္ဗာန် ၀င်စံတော်မူ၏။ ထိုညဥ့်တို့၏ အ
တွင်း၌ အကြင်တရားစကားတော်ကို ပြောဆိုတော်မူ၏၊ မိန့်မြွက်တော်မူ၏၊ ညွှန်ကြား
တော်မူ၏။
☼ ထိုအလုံးစုံသော တရားစကားတော်သည် ပြောဆိုတော်မူသည့်အတိုင်း မိန့်မြွက်
တော်မူသည့်အတိုင်း ညွှန်ကြားတော်မူသည့်အတိုင်း မှန်သည်သာလျှင်ဖြစ်ပေ၏။ မ
မှန်ဟူသော အခြားတစ်မျိုးသော အခြင်းအရာအားဖြင့် ဖြစ်ခြင်းမည်သည် မရှိသည်
သာတည်း။ ထိုကြောင့် .. သင်တို့ဆရာ ငါဘုရားကို “တထာဂတ”ဟူ၍ ခေါ်ဆိုအပ်
ပေသည်။ (အံ၊၁၊၃၃၂။)
☼ ဤအထက်ပါ လောကသုတ္တန် ဒေသနာတော်နှင့် အညီ သဗ္ဗညုတဉာဏ်တော်မြတ်
ကို ရရှိတော်မူသည့် မဟာသက္ကရာဇ် (၁၀၃)ခု ကဆုန်လပြည့်နေ့ ညဥ့်မှစ၍ ပရိနိဗ္ဗာန်
ဝင်စံတော်မူသည့် မဟာသက္ကရာဇ် (၁၄၈)ခု ကဆုန်လပြည့်နေ့ ညဥ့်အထိ (၄၅)၀ါ အ
တွင်း၌ ဘုရားရှင်၏ ဟောကြားပြသဆိုဆုံးမထားတော်မူအပ်သော တရားစကားတော်
သည်ကား ဟောကြားပြသဆိုဆုံးမထားတော်မူသည့်အတိုင်း အမှန်ချည်းသာ ဖြစ်သော
ကြောင့် မမှန်ဟူသော အခြားတစ်မျိုးသော အခြင်းအရာအားဖြင့်လည်း ဖြစ်ရိုးဓမ္မတာ
မရှိသောကြောင့် ဘုရားရှင်၏ သုတ္တအမည်ရတော်မူသည့် တရားတော်များကို ယောဂီ
သူတော်ကောင်း တစ်ဦးအနေဖြင့် လက်မခံလိုဘဲ ပယ်လှန်လိုသည်ဖြစ်အံ့၊
☼ လေးသင်္ချေနှင့် ကမ္ဘာတစ်သိန်းတို့ ကာလပတ်လုံး ပါရမီ (၁၀)ပါး, အပြား(၃၀)တို့ကို
ဖြည့်ကျင့် ဆည်းပူးတော်မူပြီးမှ ရရှိလာသည့် သဗ္ဗညုတဉာဏ်တော်မြတ်ဖြင့် ခွဲခြား
စိတ်ဖြာ၍ ဟောကြားထားတော်မူသည့် တရားတော်များကို ပယ်ရှားလိုသော သူတော်
ကောင်းတစ်ဦး၏ သန္တာန်၌ သဗ္ဗညုတဉာဏ်တော်မြတ်ကို ယှဉ်ပြိုင်ကာ စင်ပြိုင် သာသ
နာတစ်ရပ်ကို ထူထောင်နိုင်သည့် ဉာဏ်စွမ်း ဉာဏ်စ ရှိ-မရှိကိုကား စဉ်းစားနှိုင်းချိန် သင့်လှပေသည်။
☼ သို့သော် ဘုရားရှင်ကိုယ်တော်တိုင်က နာမည်ကျော် ဥပကကြီးအား ဤသို့ မိန့်ကြား
ထားတော်မူခဲ့ဖူး၏ --- “ဥပက ... ငါ့အား သဗ္ဗညုတဉာဏ် ရရှိရေးအတွက် သွန်သင်ပြ
သ ဆိုဆုံးမသည့် ဆရာဟူ၍ မရှိ၊ ငါနှင့်တူသော သူမရှိ၊ နတ်နှင့်တကွသော တစ်လော
ကလုံး၌ ငါ့အား ဖက်ပြိုင်နိုင်သော ပုဂ္ဂိုလ်လည်း မရှိ။
☼ ငါသည် လောက၌ ရဟန္တာတည်း၊ ငါသည် အတုမရှိသော သူတည်း၊ နတ်လူတို့
၏ ဆရာတည်း။ ငါတစ်ယောက်တည်းသာလျှင် အလုံးစုံသော တရားတို့ကို ကိုယ်
တိုင် မှန်စွာ သိသော တစ်ဆူတည်းသော ဘုရားတည်း။ (မ၊၁၊၂၂၇။)
☼ ဖားအောက်တောရဆရာတော် ☼
☼ (နာထသုတ္တန်တရားဒေသနာတော်) ☼
Buddhavasa Tiloka
No comments:
Post a Comment