အသိ(၃)မျိုး
-------------
အသိဟာ သညာသိ ဝိညာဉ်သိ ပညာသိ လို့သုံးမျိုးရှိတယ်။ဋီကာကျော်မှာ သညာသိကို ကလေး။ ဝိညာဉ်သိကို အမေ။ ပညာသိကို ပန်းထိမ်ဆရာနှင့် ဥပမာပေးထားတယ်။
ကလေးတစ်ယောက် ရွှေတုံးတစ်တုံး ကောက်ရတဲ့အခါ အဝါရောင်ဆိုတာလောက်ပဲသိတယ်။ ရွှေဆိုတာမသိဘူး အလေးချိန်ဘယ်လောက်ဆိုတာလည်း မသိဘူး။ ထို့အတူ အဘိဓမ္မာသင်တန်းတွေတက်လို့ ခန္ဓာဆိုတာငါးပါးရှိတယ် သစ္စာဆိုတာ လေးပါးရှိတယ် ရူပက္ခန္ဓာဆိုတာ ရုပ်ဓာတ် ၂၈ပါးကိုခေါ်တယ် ဝေဒနက္ခန္ဓာဆိုတာ ခံစားတတ်တဲ့ ဝေဒနာစေတသိက်ကို ခေါ်တယ် စသည်အားဖြင့် အမည်နှင့် အရေအတွက်လောက်ကိုပဲသိတယ်။ ဒီရုပ်နာမ်တရားတွေ မမြဲခြင်း အနိစ္စ ဆင်းရဲခြင်းဒုက္ခ အစိုးမရခြင်း အနတ္တဆိုတဲ့ လက္ခဏာယာဉ်သုံးပါးကို ထိုးထွင်းမသိဘူး။
မဂ်ဥာဏ်ဖိုလ်ဥာဏ်ကိုလည်း မရနိုင်ဘူး။ ဒီတော့ သညာသိဟာ အရောင်အဆင်း အမည်နာမစသည်တို့ကို မှတ်သားနိုင်စွမ်းပဲရှိတယ်။ အနိစ္စ ဒုက္ခ အနတ္တကိုလည်း မသိဘူး။ မဂ်ဖိုလ်ကိုလည်း မရဘူး။
ဝိညာဉ်သိကျတော့ သညာသိထက် တစ်ဆင့်မြင့်လာတယ် ကလေးရဲ့အမေဟာ ရွှေတုံးတစ်တုံးကို တွေ့တဲ့အခါ အဝါရောင်ဆိုတာလည်းသိတယ်။ ရွှေဆိုတာလည်းသိတယ် ဒါပေမယ့် အလေးချိန်ဘယ်လောက်ရှိတယ်ဆိုတာ မသိနိုင်ဘူး။ ထို့အတူ ဝိညာဉ်သိဟာလည်း ခန္ဓာငါးပါး သစ္စာလေးပါး စသည်တို့ရဲ့သရုပ် တရားကိုယ်တွေကိုလည်းသိတယ်။ ဒီရုပ်နာမ်တရားတွေရဲ့ အနိစ္စ ဒုက္ခ အနတ္တ သဘောတရားသာ ရှိပုံကိုလည်း ထိုးထွင်းမြင်နိုင်တယ်။ ဒါပေမယ့် မဂ်ဖိုလ်ကိုရနိုင်စွမ်းတော့ မရှိဘူး။
ပညာသိကတော့ အမြင့်ဆုံးပေါ့ ပန်းထိမ်ဆရာဟာ ရွှေတုံးလေးကို တွေ့လိုက်တဲ့အခါ အဝါရောင်ဆိုတာလည်းသိတယ်။ ရွှေဆိုတာလည်းသိတယ်။ အလေးချိန်ကိုလည်းသိတယ်။ ထို့အတူ ပညာသိကလည်း ခန္ဓာ အာယတန ဓာတ် သစ္စာများရဲ့ သရုပ်အဓိပ္ပာယ်ကိုလည်း သိတယ်။
ရုပ်တရား နာမ်တရား ခန္ဓာငါးပါးရဲ့ အနိစ္စ ဒုက္ခ အနတ္တကိုလည်းသိတယ် မဂ်ဖိုလ်ကိုလည်း ထိုးထွင်းသိပြီး ရရှိသွားပါတယ်။ ဒါကြောင့် ရုပ်နာမ်ခန္ဓာကို ပညာသိနဲ့ သိတဲ့အချိန်ဟာ မဂ်ဖိုလ်ကိုရတဲ့အချိန်ပါပဲ။
----------------------------------------
(မေတ္တာရှင်-ရွှေပြည်သာ)
Ko Latt ဖေ့ဘုတ်မှ
No comments:
Post a Comment