ဝိပဿနာ အလုပ်ကို မလုပ်ရင် ငရဲကျမှာလား?
************************************
ဝိပဿနာ အလုပ်ကို မလုပ်ရင် ငရဲကျမှာလား?
ဆိုတဲ့ အမေးအတွက် ဝိပဿနာမလုပ်ရုံနှင့်တော့ ငရဲမကျပါဘူး။ ဝိပဿနာဥာဏ်မပါတဲ့ ဒါန၊ သီလ၊ သမထတွေကြောင့် နတ်ဘုံ၊ ဗြဟ္မာ့ဘုံ တွေမှာ ဖြစ်နေတာ အများကြီးပါ။
သို့သော် အများအတွင်းမှာ အများနှင့် ရောပြီး ရောက်နေတဲ့ သုဂတိဘုံတွေမို့လို့ အဲဒီသုဂတိဘုံတွေမှာချည်း အမြဲနေရပြီလို့ စိတ်မချရဘူး။
ယနေ့ဗြဟ္မာ့ပြည်မှာ တဝင်းဝင်းဆိုပေမယ့် နောက်နေ့ ဝက်စားကျင်းမှာ တရှုတ်ရှုတ်ဖြစ်တတ်တယ်။ ဆိုလိုတာက ဗြဟ္မာ့ပြည်ကနေ သက်တမ်းကုန်လို့ရှိရင် အောက်အောက်သော ဘုံတွေ၊နောက်ဆုံး အပါယ်လေး ဘုံထိ ရောက်တတ်တယ်လို့ ဆိုလိုတာပါ။ဝိပဿနာဥာဏ်နှင့် ယှဉ်ပြီးရောက်နေတဲ့ သုဂတိဘဝကျတော့ သုဂတိမှာ အမြဲပဲ နေရတော့မယ်လို့ စိတ်ချရတယ်။
အဲဒီ သုဂတိဘဝကနေပဲ နိဗ္ဗာန်ကို တန်းဝင်မယ်၊ ကျွတ်တမ်းဝင်မယ်ဆိုတာ သေချာနေတယ်။ ဝိပဿနာ မလုပ်ရင် ငရဲကိုကျမယ်လို့ တထစ်ချမဆိုနိုင်ပေမယ့် ဝိပဿနာ မလုပ်သူနှင့် လုပ်သူကတော့ “သုဂတိရောက်တောင်မှ ဘဝချင်း ဒီလိုကွာခြားတယ်လို့” ဖြေရမှာ ဖြစ်ပါတယ်။
ဝိပဿနာအလုပ်ကို ဘာကြောင့်လုပ်ဖို့ လိုသလဲ?
ဆိုတဲ့ မေးခွန်းအတွက် အဖြေကတော့ အလင်းရောင် အောက်မှာ လမ်းလျှောက်နိုင်အောင်လို့ ဝိပဿနာ အလုပ်ကို လုပ်ဖို့လိုတယ်လို့ ဖြေရမှာဖြစ်ပါတယ်။ရှင်းပြပါ့မယ်။ ဝိပဿနာဥာဏ်အလင်းကိုမရသူဟာ ဒါန၊ သီလ၊ ဘယ်အလုပ်ကိုပဲလုပ်လုပ်၊ အမှောင်ထဲမှာ အလုပ်လုပ်ရတာမည်တယ်။
အမှောင်ထဲမှာ လမ်းသွားတာ မည်တယ်။ အမှောင်ထဲမှာ လမ်းသွားရင် ချောက်ကျဖို့များပါတယ်။ဝိပဿနာဥာဏ်မရရုံနှင့် ဘယ်လိုအမှောင်ထဲ လမ်းသွားနေတယ်လို့ ဆိုပါသလဲလို့မေးရင် တစ်လောကလုံးမှာ တကယ်အရှိတရားဆိုတာ သဘာဝပြီးအနေဖြင့် ရှိတယ်။
အဲဒီတကယ်ရှိ သဘာဝပြီးတရားတွေကို လောကသားတွေက အရှိကို အရှိအတိုင်း မမြင်ဘူး။ မကြည့်ဘူး။ မသိဘူး။ကိုယ်လိုချင်တဲ့ ဘက်ကိုဆွဲပြီးကြည့်တတ်တယ်။ မြင်တတ်တယ်။ ဒီတော့ အရှိတရားက တစ်မျိုး တစ်ခြားစီ ဖြစ်နေတယ်။ ဒီလိုအရှိက တစ်မျိုး၊ အသိကတစ်မျိုး တခြားစီဖြစ်နေတယ်။
ဒီလိုအရှိက တစ်မျိုး၊ အသိကတစ်မျိုး ဖြစ်နေသည်ပင်လျှင် သတ္တဝါတွေရဲ့ အမှောင်တွင်း သက်ဆင်းနေခြင်းဖြစ်ပါတယ်။ ဒါကြောင့် “အရှိကိုအရှိတိုင်း မြင်အောင်ကြည့်တတ်ဖို့ရန်”ဝိပဿနာ အလုပ်ကို လုပ်ဖို့ လိုအပ်တယ်လို့ ဖြေရပါမယ်။
ဝိပဿနာလုပ်ရင် ဘာအကျိုးရမှာလဲ?
ဆိုတဲ့ မေးခွန်းအတွက် အဖြေက ဝိပဿနာအလုပ်ကို လုပ်ရင် နိဗ္ဗာန်ရောက်မယ်။ နိဗ္ဗာန်ရောက်လိုရင်တော့ ဒီလမ်းတစ်လမ်းတည်းပဲရှိတယ်။
ဝိပဿနာဆိုတာ နိဗ္ဗာန်ရောက်လိုသူတို့ရဲ့ အဓိကအလုပ်ပါပဲ။ သံသရာထဲ တဝဲဝဲနှင့် လည်နေချင်သူတွေအဖို့တော့ ဝိပဿနာအလုပ် လုပ်လဲလုပ်ချင်ကြမယ်မဟုတ်ပါဘူး။ နည်းကတော့ မိမိက လမ်းတိုတိုနှင့် ဖြတ်ချင်သလား၊ မဖြတ်ချင်ဘူးလား။ မိမိကိုယ်ကို မိမိအဆုံးဖြစ်မှာပါ။
စာဖတ်သူအားလုံး သက်ရှည်ကျန်းမာစိတ်ချမ်းသာ၍လိုရာဆန္ဒများ တစ်လုံးတစ်ဝတည်းပြည့်စုံကြပါစေ။
အရှင်ဝိမလဝံသ(နာလန္ဒာတက္ကသိုလ်)
No comments:
Post a Comment