''ကရုဏာတရား ''
★★★★★★★★★
မြန်မာလို ကရုဏာကို အကြင်နာတရားလို့ ဘာသာပြန်လို့ရတယ်။
သို့သော် …ကရုဏာဆိုတဲ့ ပါဠိစကားလုံးရဲ့ မူရင်းအဓိပ္ပာယ်ကဘာလဲဆိုတော့
" သာဓူနံ ဟဒယကမ္ပနံ ကရောတီတိ ကရုဏာ "လို့ ဆိုတဲ့ ဝိဂြိုဟ်အရ
စိတ်ကောင်းနှလုံးကောင်းရှိတဲ့ ပုဂ္ဂိုလ်တွေကို
စိတ်နှလုံးတုန်လှုပ်မှု ဖြစ်ပေါ်စေတတ်တဲ့
သဘာဝတရားလို့ ဒီလို မှတ်ရမယ်။
လူတစ်ယောက် ဒုက္ခရောက်နေပြီဆိုရင်
ထိုပုဂ္ဂိုလ်ကို ကြည့်ပြီး အကြင်နာတရားတွေပွားလို့
ဒုက္ခတရားကို ဘယ်နည်းနဲ့ ကူညီဖြေရှင်းပေးရမလဲလို့
နှလုံးသားရဲ့ လှုံ့ဆော်မှုဖြစ်တယ်။
အဲဒီလိုလှုံ့ဆော်မှုပေးတဲ့ သဘာဝတရားကို ကရုဏာလို့ ခေါ်တယ်။
မေတ္တာဆိုတဲ့ သဘာဝတရားနဲ့လည်း ခြားနားတယ်။
မုဒိတာဆိုတဲ့သဘာဝတရားနဲ့လည်း ခြားနားတယ်။
မေတ္တာဆိုတာ လူသူမရွေးအားလုံးရဲ့ အကျိုးစီးပွားကို လိုလားတာဖြစ်တယ်။
ကရုဏာ ဆိုတာကတော့ ဒုက္ခိတသတ္တဝါ (သို့ )
အခက်အခဲ ကြုံနေတဲ့ ပုဂ္ဂိုလ်တစ်ယောက်ကို မြင်ရရင်
မြင်သူမှာ ခံစားတဲ့ နှလုံးသားရဲ့ လှုံ့ဆော်မှု။
စိတ်နှလုံးကို ငြိမ်အောင်ထားလို့မရပဲ
တစ်ဖက်သားဟဒုက္ခရောက်နေတာကို
မကြည့်နိုင် မရှုနိုင် ကူညီဖြေရှင်းလိုတဲ့
သဘာဝတရားဟာ ကရုဏာဖြစ်တယ်။
မြတ်စွာဘုရားရှင်ရဲ့ သန္တာန်မှာ ဖြစ်တဲ့ ကရုဏာဟာ
သာမာန်ပုဂ္ဂိုလ်များရဲ့ ကရုဏာနဲ့ မနှိုင်းယှဉ်လောက်အောင်
အလွန်ကြီးမားသည့်အတွက်ကြောင့်
" မဟာကရုဏာ " လို့ ခေါ်တယ်။
အလွန်ကြီးမားတဲ့ကရုဏာတရားဖြစ်တယ်။
အေး…… သတိပြုဖို့ရာက " ကရုဏာ " ဆိုတဲ့
အကြင်နာတရားမှာ " သောက " ဆိုတဲ့ စိတ်ဆင်းရဲမှု မပါဘူး။
သောကဆိုတဲ့ စိတ်မကောင်းဖြစ်တာတို့
စိုးရိမ်ပူပန်မှုတို့ ဆိုတာတွေက ကုသိုလ်တရား မဟုတ်ဘူး။
အကုသိုလ်တရားသာ ဖြစ်တယ်။
" ကရုဏာ " တရားဆိုတာက
စိုးရိမ်စိတ်တွေကင်းပြီး ဘယ်လိုကူညီဖြေရှင်းပေးရမလဲ ဆိုတဲ့စိတ်
တစ်ဖက်သားရဲ့ ဆင်းရဲဒုက္ခတွေကို ကူညီဖြေရှင်းပေးလိုတဲ့စိတ်
တစ်ဖက်သားရဲ့ ဒုက္ခကို ကြည့်ပြီးတော့
မနေစိမ့်တဲ့ သဘောတရားလို့ မှတ်ရမယ်။
ကရုဏာကင်းမဲ့သူနှင့် ကရုဏာရှိသူ
★★★★★★★★★★★★★★★★★
ကရုဏာကင်းမဲ့တဲ့ပုဂ္ဂိုလ်မှာ
ဘယ်သူသေသေ ငတေမာရင် ပြီးရောဆိုတဲ့ စိတ်ရှိတယ်လေ။
အေး… ကရုဏာ ရှိတဲ့ ပုဂ္ဂိုလ်မှာ
တော့ အဲဒီလိုစိတ်ထားမျိုး မရှိဘူး။
သူများဒုက္ခ ကူညီဖြေရှင်းပေးချင်လို့ နေမထိထိုင်မသာ
စိတ်နှလုံးဟာ လှုပ်ရှားလာတယ်။
ဘယ်ပုံဘယ်နည်းနဲ့ ဆင်းရဲဒုက္ခက လွတ်မြောက်အောင်
ကူညီဖြေရှင်းပေးရမလဲလို့ စိတ်ထဲမှာ ဖြစ်ပေါ်လာတယ်။
ကရုဏာရဲ့ ဆန့်ကျင်ဘက်
★★★★★★★★★★★★★
အဲဒီကရုဏာဟာ ဘယ်တရားရဲ့ ဆန်ကျင့်ဘက်လည်းဆိုရင်
ညှင်းပန်းနှိပ်စက်လိုတဲ့ ရက်စက်တဲ့
" ဝိဟိံသာ " လို့ဆိုတဲ့တရားရဲ့ ဆန့်ကျင်ဘက် ဖြစ်တယ်။
ကရုဏာကင်းမဲ့ပြီ အကြင်နာကင်းမဲ့ပြီဆိုလို့ရှိရင်
လူတစ်ယောက်ကို ဒုက္ခပေးတယ်။
အဲဒီဒုက္ခပေးတဲ့သဘောကို " ဝိဟိံသာ "( Cruelty )ပေါ့။
မြန်မာလိုတော့ ရက်စက်ကြမ်းကြုတ်မှုလို့ခေါ်တယ်။
ကရုဏာတရား ကင်းမဲ့တဲ့ ပုဂ္ဂိုလ်ရဲ့ နှလုံးသားဟာ
မာကြောကြမ်းကြုတ်ရက်စက်တယ်။
ကရုဏာရှိတဲ့ ပုဂ္ဂိုလ်ရဲ့ နှလုံးသားက ပျော့ပြောင်းပြီး
ဒုက္ခရောက်သူရဲ့ ဒုက္ခကို ကူညီဖြေရှင်းပေးလိုတယ်။
ရက်စက်မှုကင်းတယ်ပေါ့။
အဲဒီတော့ ကရုဏာမှာ ရန်သူနှစ်မျိုးရှိတယ်။
ကရုဏာရဲ့ ရန်သူဆိုတာ ကရုဏာမှာ
ဆန့်ကျင်ဘက်တရား နှစ်ခု ရှိတာကို ပြောတာ။
ဆန့်ကျင်ဘက်တရား(၂)ခုဆိုတာ
အနီးကပ်ဆန့်ကျင်ဘက်တရားက (၁)ခု
အဝေးဆန်ကျင်ဘက်တရားက (၁)ခု။
ဒီလို (၂)ခုရှိတယ်။
အနီးရန်သူ
★★★★★★★
အနီးကပ်ဆန့်ကျင်တဲ့သဘောတရားက ကရုဏာနဲ့ ဆင်ဆင်တူပြီး
တော့ ကရုဏာယောင် ဆောင်နိုင်တယ်။
အနီးရန်သူက ဒုက္ခကောင်းကောင်းပေးနိုင်တယ်။
အဝေးရန်သူက ဒုက္ခပေးနိုင်ပေမဲ့
အနီးကပ်ရန်သူလို မဟုတ်ဘူး။
ဒုက္ခပေးဖို့ အချိန်ယူရမယ်။
အနီးရန်သူဟာ သဘာဝချင်းဆင်ဆင်တူတဲ့ " သောက" ဖြစ်တယ်။
ကရုဏာနဲ့ သောကဟာ အလွန်နီးစပ်တယ်တဲ့။
ကရုဏာဟာ တစ်ဖက်သားကို ကြည့်ပြီး စိတ်ရဲ့ ကြင်နာမှုကိုခေါ်တယ်။
သောကဆိုတာက ဒေါသနဲ့ယှဉ်ပြီး
စိုးရိမ်မှု ခံစားချက်တစ်ခုဖြစ်တယ်။
ကရုဏာဆိုတဲ့ ဘောင်ကိုကျော်ပြီး သောက ဖြစ်သွားရင်
ကုသိုလ်လိုလိုနဲ့ အကုသိုလ်ဖြစ်သွားရော။
" သောက " ဆိုတာက ဒေါသနဲ့ယှဉ်တဲ့ ခံစားချက် ဖြစ်တယ်။
" ဒေါမနဿ ဝေဒနာ " လို့ ခေါ်တယ်။
" ဒေါမနဿ ဝေဒနာ " ဆိုတာ စိတ်ရဲ့ အရုပ်ဆိုး အကျည်းတန်တဲ့
ခံစားမှုမျိုး ဖြစ်တယ်။ အဲဒီခံစားမှုမျိုးကို " သောက " လို့ ခေါ်တယ်။
သောက က ကရုဏာယောင်ဆောင်ပြီးတော့ ဝင်လာတတ်တယ်။
အဲဒါဟာ ကရုဏာ အစစ်မဟုတ်ဘူးတဲ့။
အကုသိုလ်ဖြစ်တယ်ပေါ့။
ကရုဏာစစ်စစ်ဆိုတာ အင်မတန်မှ မွန်မြတ်သန့်စင်တဲ့ တရား။
သောက ဆိုတာဟာ အဲဒီလို မဟုတ်ဘူး။
ဖြစ်ရလေခြင်း ဆိုပြီးဝမ်းနည်းတဲ့ သဘောဖြစ်တယ်။
ဒီ (၂)ခုဟု ဆင်ဆင်တူသည့်အတွက်ကြောင့်
သောက သည် ကရုဏာ ရဲ့ အနီးကပ် ရန်သူလို့
စာပေကျမ်းဂန်တွေမှာ ဆိုတယ်။
အဲဒီတော့ အနီးကပ်ရန်သူ အနီးကပ်သဘာဝတရားကို
သတိထားပြီး မဖြစ်လာအောင် စောင့်ရှောက်ဖို့ လိုအပ်တယ်။
အဝေးရန်သူ
★★★★★★★
အဝေးရန်သူဆိုတာ သိသာမြင်သာလို့ အဝေးရန်သူလို့ ခေါ်တာ။
ကရုဏာနဲ့ သဘာဝချင်းမတူတဲ့ ရက်စက်မှု
" ဝိဟိံသာ " တရားဖြစ်တယ်။
ကရုဏာက ကြင်နာတယ်။
ဝိဟိံသာ က ရက်စက်တယ်။
သဘာဝချင်း မတူဘဲ ကွဲပြားခြားနားသည့် အတွက်ကြောင့်
အဲဒါကို ကရုဏာရဲ့ အဝေးရန်သူ ( သို့ ) အဝေးဆန့်ကျင်ဘက်
တရားလို့ ပြောရမယ်။
အေး……ဒါကြောင့်မို့ ကရုဏာ ပွားပြီဆိုရင်
အနီးကပ်ရန်သူကိုသတိထားပြီး အဝေးရန်သူ ဖြစ်တဲ့
ဝိဟိံသာ တရားကို ပျောက်ကွယ်အောင် လုပ်ရမယ်။
ဒါမှ သန့်စင် မွန်မြတ်တဲ့
သဘာဝတရားဖြစ်တဲ့ " ကရုဏာ " ဖြစ်လာနိုင်မယ်။
ကရုဏာတရားဟာ အင်မတန်မှ
မွန်မြတ်သန့်စင်တဲ့ တရားဖြစ်လို့ ဗြဟ္မဝိဟာရတရား လို့ခေါ်တယ်။
ဗြဟ္မဝိဟာရတရားလို့ ပါဠိလိုခေါ်သော်လည်း
မြန်မာလို ပြန်တော့ ဗြဟ္မစိုရ်တရား လို့ ခေါ်ကြတယ်။
ဗြဟ္မစိုရ်တရားဆိုတာ ဗြဟ္မစရိယနဲ့ ဆိုင်တယ်။
ဗြဟ္မစရိယဆိုတာမြတ်သော အကျင့်ကို ကျင့်သုံးခြင်းလို့ ဆိုလိုတယ်။
ဗြဟ္မဝိဟာရဆိုတာကတော့ မြင့်မြတ်တဲ့ နေထိုင်မှု ဖြစ်တယ်။
ဒါကြောင့်မို့English လို ပြန်တဲ့အခါမှာ Nobel aboad လို့ ပြန်တာ ဖြစ်တယ်။
ဒီစိတ်တွေနဲ့ နေလို့ ရှိရင် မြင့်မြတ်တယ်။
စိတ်ဓာတ်က မြင့်မြတ်သည့်အတွက်ကြောင့်
ပုဂ္ဂိုလ်ဟာလည်း မြင့်မြတ်တဲ့ ပုဂ္ဂိုလ် ဖြစ်သွားတယ်။
ဒါကြောင့်မို့ ဗြဟ္မဝိဟာရတရား လေးပါးကို ကျင့်သုံးကြရမယ်။
အပ္ပမညာ
★★★★★★★
မေတ္တာ ကရုဏာ မုဒိတာ ဥပေက္ခာ လို့ ဆိုတဲ့ ဗြဟ္မဝိဟာရတရား
လေးပါးကို တစ်နည်းအားဖြင့် " အပ္ပညာ " လို့လည်း ခေါ်သေးတယ်။
အတိုင်းအတာ အကန့်အသတ် မထားရမယ့် တရားလို့ အဓိပ္ပာယ်မှတ်ရမယ်။
သတ္တဝါတွေနဲ့ ပတ်သက်ပြီး အေး……
ဒီလူ့ကိုတော့ သနားတယ်။
ဟိုလူ့ကိုတော့ မသနားဘူးဆိုပြီး
အတိုင်းအတာ အကန့်အသတ်မျိုး မထားရဘူး။
အဲဒီလို အတိုင်းအတာ အကန့်အသတ် ထားလို့ရှိရင်
ဒါဟာ " အပ္ပမညာ "မဟုတ်တော့ဘူး။
သတ္တဝါ မှန်သမျှအပေါ်မှာ တညီတည်းထားနိုင်ရမယ်။
အားလုံးအပေါ်မှာ မေတ္တာ ပွားရင်လည်း တညီတည်းထားနိုင်ရမယ်။
ကရုဏာ ပွားရင်လည်း ဒုက္ခရောက်နေတဲ့ ပုဂ္ဂိုလ်သတ္တဝါတွေ
အားလုံးအပေါ်မှာ ထားနိုင်ရမယ်။
မုဒိတာ ထားရင်လည်းပဲ အောင်မြင်ကြီးပွားနေတဲ့ ပုဂ္ဂိုလ်တွေ အာလုံးအပေါ်မှာ
တညီတည်း ထားနိုင်တာမျိုး ဖြစ်ရမယ်။
ဒီကရုဏာတရားဟာ
လူတိုင်းမှာ ရှိသင့်တဲ့ တရားဖြစ်သော်လည်းပဲ
သာမာန်ပုဂ္ဂိုလ်တွေမှာ မရှိကြဘူး။
လူတိုင်းမှာ မရှိကြဘူး။
အဲဒါကြောင့်မို့ ရှိဖို့ ဖြစ်ပေါ်လာဖို့ လေ့ကျင့်ယူရမယ်ပေါ့။
( ပါမောက္ခချုပ်ဆရာတော် ဒေါက်တာအရှင်နန္ဒမာလာဘိဝံသ)
ဆရာတော်ဟောကြားတော်မူသော " ဘဝဆည်းဆာ ကရုဏာ "
တရားတော် စာမျက်နှာ - ( ၁ မှ ၁၄ ) မှ ထုတ်နုတ်ဖော်ပြထားပါ
သည်။ ဓမ္မမိတ်ဆွေများအားလုံး ဗြဟ္မစိုရိတရားလေးပါးနှင့်အညီ
နေထိုင်ပြီး စစ်မှန်သော ကရုဏာ ထားရှိနိုင်ကြပါစေ။
Posted by Words of Buddha
No comments:
Post a Comment