ပုဂ္ဂိုလ်(၁၂)မျိုး

 

ပုဂ္ဂိုလ်(၁၂)မျိုး
---------------
၁။ ဒုဂ္ဂတိ အဟိတ်ပုဂ္ဂိုလ်
 
၂။ သုဂတိ အဟိတ်ပုဂ္ဂိုလ်
 
၃။ ဒွိဟိတ် ပုဂ္ဂိုလ်
 
၎။ တိဟိတ် ပုဂ္ဂိုလ်
 
၅။ သောတာပတ္တိ မဂ္ဂဋ္ဌာန်ပုဂ္ဂိုလ်

 
၆။ သောတာပတ္တိ ဖလဋ္ဌာန်ပုဂ္ဂိုလ်
 
၇။ သကဒါဂါမိ မဂ္ဂဋ္ဌာန်ပုဂ္ဂိုလ်
 
၈။ သကဒါဂါမိ ဖလဋ္ဌာန်ပုဂ္ဂိုလ်
 
၉။ အနာဂါမိ မဂ္ဂဋ္ဌာန်ပုဂ္ဂိုလ်
 
၁၀။အနာဂါမိ ဖလဋ္ဌာန်ပုဂ္ဂိုလ်
 
၁၁။ အရဟတ္တ မဂ္ဂဋ္ဌာန်ပုဂ္ဂိုလ်
 
၁၂။ အရဟတ္တ ဖလဋ္ဌာန်ပုဂ္ဂိုလ်

--------------------------------

၁။ ဒုဂ္ဂတိ အဟိတ်ပုဂ္ဂိုလ် = ငရဲ ပြိတ္တာ အသူရကာယ် တိရစ္ဆာန်များ။

၂။ သုဂတိ အဟိတ်ပုဂ္ဂိုလ် = ပဋိသန္ဓေအားဖြင့် ဆွံ့ အ ပင်း ကန်း ကျိုး ရူး အင်္ဂါမစုံသောလူများ နပုံး ပဏ္ဍုက် ဥဘောတောဗျည်းများ ဘုမ္မစိုး ရုက္ခစိုး စသော လူ့ဘုံရှိ ဝိနိပါတိကာနတ်များ။

၃။ ဒွိဟိတ် ပုဂ္ဂိုလ် = တရားထူးမရနိုင်သေးဘဲ ပါရမီမျိုးစေ့ကို ချပျိုးနိုင်သော လူဘုံနှင့် နတ်ပြည်ခြောက်ထပ်ရှိ သာမန်လူ နတ်များ။

၎။ တိဟိတ် ပုဂ္ဂိုလ် = တရားထူးရနိုင်သော လူ့ဘုံ နတ်ဘုံ ဗြဟ္မာဘုံရှိ လူ နတ် ဗြဟ္မာများ။

၅။ သောတာပတ္တိ မဂ္ဂဋ္ဌာန်ပုဂ္ဂိုလ် = သောတာပန်ဖြစ်သော လမ်းကြောင်းပေါ်သို့ ရောက်ရှိနေသူ။

၆။ သောတာပတ္တိ ဖလဋ္ဌာန်ပုဂ္ဂိုလ် = လောဘ ဒေါသ မောဟ မာန ဒိဋ္ဌိ ဝိစိကိစ္ဆာ ထိန ဥဒ္ဓစ္စ အဟိရိက အနောတ္တပ္ပ ဟူသော အပူဓာတ် အညစ်အကြေး ကိလေသာ ၁၀ မျိုးအနက် ဒိဋ္ဌိနှင့် ဝိစိကိစ္ဆာကို အကြွင်းမဲ့ပယ်သတ်ထားပြီးသူ ဖြစ်သည်။ ဟိမဝန္တာမှ စီးဆင်းလာသောရေသည် မဟာသမုဒ္ဒရာအရောက် စီးဆင်းသွားပြီး ဟိမဝန္တာသို့ ပြန်လည်စီးတက်လာမှု မရှိသကဲ့သို့ သောတာပန်ပုဂ္ဂိုလ်တို့၌ ဖြစ်ပွားနေသော မဂ္ဂင် ၈ ပါးသည် ရဟန္တာဖြစ်သည်အထိ ဖြစ်ပွားပြီး ပုထုဇဉ်ပြန်ဖြစ်ရန် မရှိသောပုဂ္ဂိုလ် ဖြစ်သည်။

ဒိဋ္ဌိအရ " ခန္ဓာကို အတ္တ" ဟုစွဲယူသော သက္ကာယဒိဋ္ဌိအပြင် " အတ္တ မြဲသည်" ဟုယူသော သဿတဒိဋ္ဌိ " သေလျှင် ပြတ်သည်" ဟု ယူဆသော ဥစ္ဆေဒဒိဋ္ဌိ " ကောင်းမှု မကောင်းမှုကံ အကျိုးမရှိ" ယူခြင်း နတ္ထိကဒိဋ္ဌိ " ကောင်းမှု မကောင်းမှုကံ ကြောင်းကျိုးမရှိ" ဟု ယူခြင်း အဟေတုကဒိဋ္ဌိ " ကောင်းမှု မကောင်းမှုပြုသော်လည်း ပြုသည်မမည် ကံကြောင်းမရှိ" ဟုယူခြင်း အကိရိယ ဒိဋ္ဌိ ၅ မျိုးကို ယူရသည်။

သောတာပန်ပုဂ္ဂိုလ်သည် ဒိဋ္ဌိနှင့် ဝိစိကိစ္ဆာကို ပယ်ပြီးသူဖြစ်၍ အကုသိုလ်စိတ် ၁၂ ပါးတွင် ဒိဋ္ဌိဂတသမ္ပယုတ်စိတ် ၄ ပါးနှင့် ဝိစိကိစ္ဆာစိတ်များ မဖြစ်ကြသော်လည်း ကျန်ဒိဋ္ဌိဂတဝိပ္ပယုတ်စိတ် ၄ ပါး ဒေါသစိတ် ၂ ပါး ဥဒ္ဓစ္စသဟဂုတ်စိတ်များ ကား ဖြစ်ကြသေးသည်။ 

သို့ရာတွင် ကျန်စိတ်များ၏ အပါယ်ကျစေနိုင်သော သတ္တိအင်အားကို မဂ်တရားက ဖျက်ချိုးထားပြီး ဖြစ်သောကြောင့် သောတာပန်ပုဂ္ဂိုလ်၌ ဣဿာ မစ္ဆရိယစသော အကုသိုလ် အကြမ်းစားများ မဖြစ်နိုင်ပြီ။ ထို့ကြောင့် အပါယ်မကျနိုင်ပါ။ တစ်ဖန် သောတာပန်မဖြစ်မီက ပြုခဲ့သော အကုသိုလ်များလည်း အဝိဇ္ဇာ တဏှာ ဟူသော ဝဋ်မြစ်ကို အဖော်ရမှ အပါယ်ကျနိုင်ကြသည်။ 

 သောတာပန်တို့ သန္တာန်၌ရှိသော အဝိဇ္ဇာ တဏှာဟူသော ဝဋ်မြစ်တို့မှာလည်း အပါယ်ကျစေနိုင်သော အစွမ်းသတ္တိမရှိသောကြောင့် ယခင်ကပြုခဲ့သော အကုသိုလ်များလည်း အဝိဇ္ဇာ တဏှာ အဖော်မရသဖြင့် အပါယ်မကျနိုင်ပြီ။ ထို့ကြောင့် သောတာပန် အဆင့်သို့ရောက်သော ပုဂ္ဂိုလ်သည် အပါယ်ဘေးမှ ကင်းဝေးရန် သေချာနေတော့သည်။ အပါယ်တံခါးပိတ်တော့သည်။

အထူးမှာ သောတာပန်ပုဂ္ဂိုလ်သည် ဒိဋ္ဌိ ဝိစိကိစ္ဆာကို ပယ်ချင်းတူသော်လည်း နူးညံ့သောသဒ္ဓိနြေ္ဒ စသော ဣနြေ္ဒ ၅ ပါးရှိသော မုဒိန္ဒြိယပုဂ္ဂိုလ် ၎င်း ဣနြေ္ဒ ၅ ပါး အလယ်အလတ်ရှိသော မဇ္ဈိမိန္ဒြိယပုဂ္ဂိုလ် ၎င်း ၅ ပါးထက်မြတ်သော တိက္ခိန္ဒြိယပုဂ္ဂိုလ် ဟု ဣနြေ္ဒချင်း ခြားနားသောကြောင့် ၇ ဘဝ ပဋိသန္ဓေနေရသော သတ္တက္ခတ္တုပရမသောတာပန် ၂ ဘဝမှ ၆ ဘဝတိုင် ပဋိသန္ဓေနေရသော ကောလံကောလသောတာပန် တစ်ဘဝသာ ပဋိသန္ဓေနေရသော ဧကဗီဇိသောတာပန် ဟူ၍ ၃ မျိုး ကွဲပြားလာရသည်။ ဤ ၃ မျိုးသော သောတာပန်ပုဂ္ဂိုလ်မှာ လူ့ပြည် နတ်ပြည်၌ အရောအားဖြင့် ပဋိသန္ဓေနေရသော သောတာပန်ပုဂ္ဂိုလ်အတွက်သာ ဖြစ်သည်။ 

အထက်နတ်ပြည် ဗြဟ္မာပြည်တို့၌ ဘုံစဉ်စံပြီးလျှင် အကနိဋ္ဌဘုံ၌ ပရိနိဗ္ဗာန်ဝင်စံမည့် သိကြားမင်းစသည်ကဲ့သို့ သောတာပန်မျိုးနှင့် လူ့ပြည်၌ချည်းသက်သက် ၇ ကြိမ်အထိ ပဋိသန္ဓေနေရသော သောတာပန်မျိုးကား ၎င်း ၃ မျိုးတွင် ပါဝင်ချေ။ ဧကဗီဇိသောတာပန်မှာလည်း လူ့ပြည်၌ တစ်ကြိမ် ပဋိသန္ဓေနေရသော သောတာပန်မျိုးကိုသာ ဆိုလိုသည်။

တစ်ဖန် အထက်ဖော်ပြပါ သောတာပန် ၃ မျိုးကို မဟာသောတာပန်ခေါ်ပြီး ဝိသုဒ္ဓိ ၇ ပါးတွင် ကင်္ခါဝိတရဏဝိသုဒ္ဓိ အဆင့်ရှိပြီးသော ပုဂ္ဂိုလ်များကိုမူ စူဠသောတာပန် ဟုခေါ်သည်။ စူဠသောတာပန်သည် လောကီ သီလ သမာဓိ ပညာ ဟူသော သမ္ပဒါ ၃ မျိုးနှင့် ပြည့်စုံသဖြင့် မဟာသောတာပန်ကဲ့သို့ ဘဝဆက်တိုင်း သုဂတိမြဲသည်ဟု မဆိုနိုင်သော်လည်း ဒုတိယဘဝ၌မူ သုဂတိမြဲသည်ဟု ဝိသုဒ္ဓိမဂ် မဟာဋီကာ၌ ဖွင့်ဆိုထားသည်။

 အင်္ဂုတ္တရအဋ္ဌကထာ နဝကနိပါတ် သီဟနာဒဝဂ် သဥပါဒိသေသသုတ် အဖွင့်၌ကား သရဏဂုံတည်သူ နှစ်စဉ်မဟာဒုတ်မဲ ချလှူသူ ငါးပါးသီလမြဲသူ လဆန်း ၁ ရက် လဆုတ် ၁ ရက် ၌ ဝတ်မပျက် ရည်စူးလှူသူ နှစ်စဉ် ဝါဆိုသင်္ကန်းတစ်ထည် လှူသူ နှစ်စဉ် ကထိန်ခင်းလှူသူ ကျောင်းကန်ဘုရား ဇရပ် တံတား ရေတွင်း လမ်းခင်း ဥယျာဉ်ခြံမြေ လယ်ယာလှူခြင်း စသော နေ့စဉ်လစဉ်နှစ်စဉ် ဝတ်မြဲအောင် လှူသူ ကာလကြာရှည်တည်တံ့သော သစ်ပင် စသည်ကို အလှူသဘောစိုက်ပျိုးခြင်း နိဗဒ္ဓထာဝရကုသိုလ် ရှိသူမှန်သမျှ စူဠသောတာပန်ဖြစ်၍ ဒုတိယဘဝ၌ သုဂတိမြဲသည်ဟု ဆိုသည်။

၇။ သကဒါဂါမိ မဂ္ဂဋ္ဌာန်ပုဂ္ဂိုလ် = သကဒါဂါမ်ဖြစ်ရန် လမ်းကြောင်းပေါ် ရောက်ရှိနေသူ။

၈။ သကဒါဂါမိ ဖလဋ္ဌာန်ပုဂ္ဂိုလ် = ဒိဋ္ဌိ ဝိစိကိစ္ဆာ ဟူသော ကိလေသာ ၂ ပါးကို အကြွင်းမဲ့ပယ်ပြီးသည့်အပြင် ကာမ ရာဂ ဟူသော လောဘ ဒေါသနှင့် ဒိဋ္ဌိဂတဝိပ္ပယုတ်၌ ယှဉ်သော မောဟကိလေသာတို့ကို ခေါင်းပါးအောင် ပြုလုပ်ပြီးသူ။ လူ့ပြည်သို့ တစ်ကြိမ်သာလာမည့်သူ။

ဝဋ်၌ ကျင်လည်နေရသော လူအပေါင်းတွင် ထူထပ်သောကိလေသာများ အမြဲမပြတ် ဖြစ်နေသကဲ့သို့ မဟုတ်ဘဲ သကဒါဂါမ်ပုဂ္ဂိုလ်တို့၌ ၎င်း ကာမရာ ဒေါသနှင့်မောဟတို့ တစ်ခါတစ်ရံသာဖြစ်သည်။ ဖြစ်သော်လည်း ကျဲကျဲပါးပါးသာ ဖြစ်သည်။ ထို့ကြောင့် သကဒါဂါမ်ပုဂ္ဂိုလ်တို့သည် အိမ်ထောင်သားမွေးခြင်း ရှိကြသော်လည်း ထူထပ်သော ကိလေသာရာဂကြောင့် ဖြစ်သည် မဟုတ်ချေ။ ကိုယ်အင်္ဂါကို သုံးသပ်ကာမျှဖြင့်လည်း သားမွေးခြင်း ဖြစ်နိုင်သဖြင့် ကိလေသာထူထပ်မှု မရှိကြောင်း သိနိုင်သည်။ သကဒါဂါမ်သည် ၆ မျိုးရှိသည်။

- ဤလူ့ပြည်၌ သကဒါဂါမ်ဖြစ်၍ ဤလူ့ပြည်၌ပင် ဘဝမခြားဘဲ အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

- ဤလူ့ပြည်၌ သကဒါဂါမ်ဖြစ်၍ ဒုတိယဘဝနတ်ပြည်၌ အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

- နတ်ပြည်၌ သကဒါဂါမ်ဖြစ်၍ ထိုနတ်ပြည်၌ပင် အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

- နတ်ပြည်၌ သကဒါဂါမ်ဖြစ်၍ ဒုတိယဘဝလူ့ပြည်၌ အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

- လူ့ပြည်၌ သကဒါဂါမ်ဖြစ်၍ ဒုတတိယဘဝနတ်ပြည်၌ ပဋိသန္ဓေနေပြီးနောက် တတိယဘဝတွင် ဤလူ့ပြည်၌ အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

- နတ်ပြည်၌ သကဒါဂါမ်ဖြစ်၍ ဒုတိယဘဝလူ့ပြည်၌ ပဋိသန္ဓေနေပြီးနောက် တတိယဘဝတွင် နတ်ပြည်၌ အနာဂါမ်ရဟန္တာဖြစ်ကာ ပရိနိဗ္ဗာန်ပြုသူ။

၉။ အနာဂါမိ မဂ္ဂဋ္ဌာန်ပုဂ္ဂိုလ် = အနာဂါမ်ဖြစ်သော လမ်းကြောင်းပေါ် ရောက်ရှိနေသူ။

၁၀။ အနာဂါမိ ဖလဋ္ဌာန်ပုဂ္ဂိုလ် = သကဒါဂါမ်ဘဝ၌ ခေါင်းပါးအောင်ပြုထားသော ကာမ ရာဂဟူသော လောဘ ဒေါသနှင့် ဒိဋ္ဌိဂတဝိပ္ပယုတ်စိတ်၌ယှဉ်သော မောဟကိလေသာတို့ကို အကြွင်းမဲ့ပယ်ပြီးသူ။

အနာဂါမ်ပုဂ္ဂိုလ်သည် ကာမရာဂကို (ဝါ) ကာမတဏှာကို အကြွင်းမဲ့ပယ်ထားပြီး ဖြစ်သောကြောင့် ကာမဘုံ၌ ပဋိသန္ဓေမနေရတော့ပြီ။ သို့ရာတွင် ရူပရာဂ အရူပရာဂ ဟူသော လောဘကိလေသာကို မပယ်ရသေးသဖြင့် ရူပ အရူပဗြဟ္မာဘုံတို့၌ ပဋိသန္ဓေ နေနိုင်သေးသည်။ ထို့ကြောင့် လူ့ဘုံက အနာဂါမ်ပုဂ္ဂိုလ်သည် ဤဘဝ၌ပင် ရဟန္တာဖြစ်လျှင်ဖြစ် မဖြစ်က ရူပ အရူပဘုံတို့၌ ပဋိသန္ဓေနေ၍ ထိုမှတစ်ဆင့် ရဟန္တာအဖြစ်ကိုယူကာ ပရိနိဗ္ဗာန်ပြုနိုင်သည်။ အနာဂါမ်မှာလည်း ၅ မျိုးရှိသည်။

- ရောက်ရှိရာဘုံသက်တမ်း ထက်ဝက်အတွင်း၌ ရဟန္တာဖြစ်၍ ပရိနိဗ္ဗာန်ပြုခြင်း။

- ရောက်ရှိရာဘုံသက်တမ်း ထက်ဝက်လွန်ပြီး နောက်ထပ်ထက်ဝက်သို့ ရောက်သောအခါ၌ ရဟန္တာဖြစ်၍ ပရိနိဗ္ဗာန်ပြုခြင်း။

- အလွန်အားထုတ်ရခြင်း မရှိဘဲ ရဟန္တာဖြစ်၍ ပရိနိဗ္ဗာန်ပြုခြင်း။

- အလွန်အကဲအားထုတ်ခြင်းဖြင့် ရဟန္တာဖြစ်၍ ပရိနိဗ္ဗာန်ပြုခြင်း။

- မိမိဖြစ်ရာ သုဒ္ဓါဝါသဘုံမှ အကနိဋ္ဌဘုံတိုင်အောင် ဆန်တက်၍ အကနိဋ္ဌဘုံ၌ ရဟန္တာဖြစ်၍ ပရိနိဗ္ဗာန်ပြုခြင်း။

၁၁။ အရဟတ္တ မဂ္ဂဋ္ဌာန်ပုဂ္ဂိုလ် = ရဟန္တာဖြစ်သော လမ်းကြောင်းပေါ် ရောက်ရှိနေသူ။

၁၂။ အရဟတ္တ ဖလဋ္ဌာန်ပုဂ္ဂိုလ် = ကိလေသာ ၁၀ ပါးအနက် သောတာပန် သကဒါဂါမ် အနာဂါမ်ဘဝ၌ မပယ်နိုင်သေးသော ရူပရာဂ အရူပရာဂ ဟူသော လောဘတစ်စိတ်။ ဥဒ္ဓစ္စ သဟဂုတ်စိတ်၌ရှိသော မောဟတစ်စိတ်နှင့် မာန ထိန ဥဒ္ဓစ္စ အဟိရိက အနောတ္တပ္ပ ဟူသော ကိလေသာတို့ကို အကြွင်းမဲ့ပယ်လိုက်ပြီးသူ။ ကိလေသာ ၁၀ ပါးလုံးကို လုံးဝပယ်ပြီးသူ ဟူလိုသည်။ လူ နတ် ဗြဟ္မာ သတ္တဝါတို့၏ ပူဇော်အထူးကို ခံယူတော်မူထိုက်သူ အဆင့်သို့ ရောက်ရှိပြီးသူ ဖြစ်သည်။

ဖော်ပြပါ ပုဂ္ဂိုလ် ၁၂ ပါးတွင် ရဟန္တာပုဂ္ဂိုလ်ကို အမြင့်ဆုံး အမြတ်ဆုံးအဖြစ် တွေ့ရှိနိုင်သည်။ လူ နတ် ဗြဟ္မာများသည် မိမိတို့၏ ပါရမီအားလျော်စွာ ရဟန္တာအဖြစ်ကို ရရှိနိုင်သည်။ ရဟန္တာဖြစ်သော ပုဂ္ဂိုလ်သည် ဘဝသံသရာ၌ နောက်ထပ်တစ်ဖန် ပြန်လည်ဖြစ်ရန် မရှိတော့သဖြင့် နိဗ္ဗာန်ကိုရရှိသော ပုဂ္ဂိုလ်လည်းဖြစ်သည်။ ပရိနိဗ္ဗာန် မပြုသေးက ခန္ဓာကိုယ်အကြွင်းရှိသော သဥပါဒိသေသနိဗ္ဗာန်ကို ရရှိသည် မည်၏။ ပရိနိဗ္ဗာန်ပြုပြီးက ခန္ဓာကိုယ်အကြွင်းမရှိသော အနုပါဒိသေသနိဗ္ဗာန်ကို ရရှိသည် မည်၏။ နိဗ္ဗာန်ရရှိသော ပုဂ္ဂိုလ်သည် ကိလေသာအပူဓာတ်များ မရှိသောကြောင့် အမြဲထာဝရ ငြိမ်းအေးချမ်းသာ (သန္တိသုခ) ကို ခံစားရတော့သည်။

ဗုဒ္ဓမြတ်စွာသည်လည်း ပုဂ္ဂိုလ် ၁၂ ပါးတွင် ရဟန္တာအဆင့်ရှိသော ပုဂ္ဂိုလ်ပင် ဖြစ်သည်။ သို့သော် ရဟန္တာပုဂ္ဂိုလ်မှာလည်း ပု ဒိ အာ ခေါ် ပုဗ္ဗေနိဝါသာနုဿတိ (ဘဝဟောင်းအောက်မေ့ နိုင်သောဥာဏ်) ဒိဗ္ဗစက္ခု (သေးသေးလျှုိ့ဝှက် အာရုံကို နတ်မျက်စိကဲ့သို့ မြင်နိုင်သောဥာဏ်) အာသဝက္ခယ (အာသဝေါတရား ကုန်ခမ်းသောဥာဏ်) ဟူသော ဝိဇ္ဇာ ၃ ပါးရရှိသော တေဝိဇ္ဇာပတ္တရဟန္တာ " ဓမ္မ အတ္တ နိရုတ္တိ ပဋိဘာန " ဟူသော ပဋိသမ္ဘိဒါဥာဏ် ၄ ပါးရရှိသော ပဋိသမ္ဘိဒါပတ္တရဟန္တာ အဘိညာဉ် ၆ ပါးတို့ကို ရရှိသော ဆဠာဘိညရဟန္တာ ဈာန်ရရှိသော ဈာနလာဘီရဟန္တာ ရိုးရိုးဖြစ်သော ဈန်အစေးမကပ်သော သုက္ခဝိပဿကရဟန္တာ စသည်ဖြင့် အမျိုးမျိုးရှိပြန်ရာ ဗုဒ္ဓမြတ်စွာဘုရားသည် ပါရမီ ၁၀ ပါးတို့ကို ၄ အသင်္ချေနှင့် ကမ္ဘာတစ်သိန်း မျှ ဖြည့်ကျင့်ဆည်းပူးတော်မူခဲ့ရပြီး ဘုရား ဟု သတ်မှတ်ခေါ်ဝေါ်နိုင်သော သမ္မာသမ္ဗောဓိဥာဏ် (ဝါ) ဣန္ဒြိယပရောပရိယတ္တိ သတ္တဝါတို့ ဣနြေ္ဒနုရင့်ကို သိခြင်း အာသယာနုသယသတ္တဝါတို့၌ ကိန်းနေသောကိလေသာကို သိခြင်း ယမကပါဋိဟာရိယ ရေမီးအစုံစုံ တန်ခိုးပြနိုင်စွမ်း မဟာကရုဏာသမာပတ္တိ မဟာကရုဏာသမာပတ်ဝင်စားမှု သဗ္ဗညုတ တရားအလုံးစုံသိနိုင်စွမ်းနှင့် အနာဝရဏ တရားအားလုံး သိနိုင်ရေးအတွက် အပိတ်အပင်မရှိအောင် ကူပံ့ပေးသောဥာဏ် ဟူသော အများနှင့်မဆက်ဆံသော အသာဓာရဏဥာဏ်တော် ၆ ပါးကို ရရှိတော်မူသောကြောင့် အခြားသော လူ နတ် ဗြဟ္မာ ရဟန္တာအမျိုးမျိုးတို့ထက် သာလွန်မြင့်မြတ်လာပြန်သည်။

တစ်နည်းအားဖြင့် သတ္တလောကတွင် (ဝါ) ဗြဟ္မာ နတ် လူ ၃ဘုံသူတွင် အမြင့်မြတ်ဆုံးသော ပုဂ္ဂိုလ်ဖြစ်တော့သည်။ ထို့ကြောင့် ဗုဒ္ဓဘာသာဝင်များက ဗုဒ္ဓမြတ်စွာကို အမြင့်မြတ်ဆုံးသူ " ဘုရား" အဖြစ် အထွတ်အမြတ်ပြု၍ ကိုးကွယ်ကြခြင်း ဖြစ်သည်။ မြတ်စွာဘုရားလောက် ပါရမီမဖြည့်ဆည်းရသော (ဝါ) ပါရမီ ၁၀ ပါးကို ၂ အသင်္ချေနှင့် ကမ္ဘာတစ်သိန်းမျှ ဖြည့်ကျင့်ဆည်းပူးခဲ့ရပြီး ပစ္စေကဗောဓိဥာဏ်ကို ရရှိတော်မူသော ရဟန္တာအရှင်များကိုမူ " ဘုရားငယ်" သို့မဟုတ် " ပစ္စေကဗုဒ္ဓါ" ခေါ်ကြသည်။ ဤ ပစ္စေကဗုဒ္ဓါခေါ်သော ဘုရားငယ်များသည် မိမိတို့ကိုယ်တိုင် သစ္စာတရားလေးပါးကို ပိုင်းခြားထင်ထင် သိမြင်တော်မူကြသော်လည်း သတ္တဝါတို့အား ဟောနိုင်ခြင်း မရှိပါ။ ၎င်းအပြင် " ပစ္စေကဗုဒ္ဓါ" ခေါ်သော ဘုရားငယ်အရှင်မြတ်များသည် သာသနာတွင်းအခါ၌ ပွင့်တော်မူခြင်း မရှိဘဲ သာသနာအပအခါ၌သာ ပွင့်တော်မူကြသည်။ ကျန်ရဟန္တာအရှင်မြတ်များမှာ မူ အထိုက်အလျောက်သာ ပါရမီဖြည့်ကျင့်ရပြီး ယင်းပါရမီအလိုက် အဂ္ဂသာဝက မဟာသာဝက စသည်ဖြင့် ကွဲပြားလာရသည်။
-----------------------------------

ဦးစိန်ထွန်း- သုတေသီ

ဓမ္မမိတ်ဆွေများ ကိုယ်စိတ်နှစ်ဖြာ ရွှင်လန်းချမ်းမြေ့ကြပါစေ။

 

 

Ko Latt ဖေ့ဘုတ်မှ