ဘုရားပွဲ၊ အလှူပွဲတို့မှာ အိုးစည်ဝိုင်း၊ ဒိုးပတ်ဝိုင်း၊ ဗျောတို့ပါကြတယ်။ ဘုန်းဘုန်းတို့အရပ်မှာပတ်ခြောက်ဝိုင်းဆိုတာ ရှိတယ်။ ဒိုးပတ်ဝိုင်းကြီး အတိုင်းပဲ ဒိုးပတ်ပါတယ်၊ လင်းကွင်းပါတယ်၊ နှဲပါတယ်၊ ၀ါးလက်ခုပ်ပါတယ်၊ မောင်းပါတယ်။ ဒိုးပတ်ဝိုင်းတော့ ဒိုးပတ်ဝိုင်းပဲ ဒါပေမဲ့ အသံမထွက်ဘူး။
ဒိုးပတ်ဝိုင်းအတိုင်း ၀ါးနဲ့ချိုးပြီး စက္ကူနဲ့ လုပ်ထားတာ၊ နှဲဆိုရင်လဲ နှဲအတိုင်း ၀ါးနှီး စက္ကူနဲ့ လုပ်ထား
တာ၊ ၀ါးလက်ခုပ်လဲ အဲဒီလိုပဲ ၀ါးနှီးနဲ့လုပ်ပြီး စက္ကူနဲ့ လုပ်ထားတာ၊ ဒိုးပတ်ဆိုရင်လဲ ဒီအတိုင်းပဲ
မောင်းဆိုရင်လဲ ဒီအတိုင်းပဲ၊ မောင်းတီးတဲ့ဒုတ်လဲ ဒီအတိုင်းပဲ ၀ါးနှီးနဲ့ရက်ပြီး စက္ကူနဲ့ လုပ်ထားတာ။
တီးတော့တီးတယ် အသံမမြည်ဘူး။ ခေါင်းဆောင်က ရွှိ..လို့ ခရာမုတ်လိုက်တာနဲ့ အကုန်တီးကြတယ်
ပါးစပ်ကလဲ ဘာအသံမှမထွက်ဘူး။
တီးတဲ့ဟာတွေကလဲ ဘာအသံမှ မထွက်ဘူး အဲဒီလို အသံမထွက်
ဘဲ ခြောက်ကပ်ကပ် တီးဝိုင်းကို ပတ်ခြောက်ဝိုင်းလို့ခေါ်တယ်။
ကာလသားတွေက လုပ်ကြအုံးမယ်ကွ ဆိုတော့ လုပ်ဟေ့၊ အိမ်က၀ါးလုပ်ငန်း လုပ်တော့
ဝါးကျွမ်းကျင်တယ်၊ ၀ါးကိုနှီးထိုး ဒိုးပတ်လုပ်၊ မောင်းလုပ်၊ လင်းကွင်းလုပ်၊ ၀ါးလက်ခုပ်လုပ်ပေါ့၊
ကိုယ်ကလဲ ၀ါးလက်ခုတ်တီးတဲ့ အထဲပါတယ် ၀ါး စက္ကူနဲ့လုပ်ပြီး အသံမမြည်အောင် တီးရတာ။
တီးတဲ့သူတွေက တိုက်ပုံအင်္ကျီ လုံချည်အကွက်ကြီး ကိုယ်စီဝတ်စုံ ၀တ်ထားကြတယ်။ အလှူလှည့် ပြီဆိုရင် လူတွေက ဘာကိုကြည့်သလဲဆိုရင် အဲဒီ ပတ်ခြောက်ဝိုင်းကိုကြည့်တယ်။ ကြည့်တဲ့သူ ဖက်ကတော့ ဘာအတွက်ကြည့်သလဲ မသိဘူး၊ တီးရတဲ့သူကတော့ လူတွေများများ ၀ိုင်းကြည့်နေပြီ
ဆိုရင် တီးတာပဲ၊ ဘာအသံမှ မထွက်ဘူး။
ခေါင်းဆောင်က ရွှိ..ဆိုတာနဲ့ ၀ုန်း ၀ုန်း ၀ုန်းနဲ့ (အသံတော့
မမြည်ဘူး) ခေါင်းဆောင်က ရွှိ..ဆိုရင် ရပ်လိုက်၊ ရပ်လိုက်တဲ့ အချိန်မှာ လက်ရွယ်တဲ့ အတိုင်းပဲ၊
လင်းကွင်းက ထိနေရင် ထိနေတဲ့အတိုင်းပဲ၊ ဟနေရင် ဟနေတဲ့အတိုင်းပဲ ပြရတာ၊ တခြားဟာတွေလဲ
ဒီအတိုင်းပဲ၊ အခုခေတ် VCD ကြည့်နေရင်း Pause လုပ်ထားလိုက်သလို လူတွေကလဲ ငြိမ်နေတာ။
တကယ့် ဒိုးပတ်ဝိုင်းကျတော့ သိပ်မကြည့်ကြဘူး၊ ဒီအသံမထွက်တာကျတော့ ကြည့်ချင်ကြ
တယ်၊ အဲဒီ လှည့်နေတုံး အချိန်ကတော့ ဘယ်စဉ်းစားမှာအုံး၊ လှည့်နေတုံးကတော့ ကိုယ်ပါတဲ့ဝိုင်း
ကြည့်လေလေ သဘောကျလေပေါ့၊ ရွှိ..ဆိုတာနဲ့ အား..၊ ရွှိ..ဆိုတာနဲ့ ရပ်၊ ပုံပေါ်အောင် မပြောပြ
နိုင်တာကတော့ ဘုန်းဘုန်းဖက်က ညံ့တာ။
အိမ်ပြန်ရောက်မှ စဉ်းစားတယ်၊ ဒို့.. အသံမထွက်ဘဲနဲ့ တီးတာကို လူတွေကကြည့်တာ ဘာ
လို့ ကြည့်တာလဲ? ၊ ဆိုင်းဝိုင်းဆိုတာ အသံမြည်ရမှာ၊ ဆိုင်းဝိုင်းဆိုတာ နားထောင်စရာကောင်းရမှာ၊
အခုကျတော့ ဆိုင်းဝိုင်းလုပ်ပြီးတော့ အသံမထွက်တဲ့ ဆိုင်းဝိုင်းဆိုလို့ တော်တော်အံ့စရာကြီးပါလား၊
“ ငါ့ဘ၀မှာ ငါကအသံမထွက်တဲ့ ဆိုင်းဝိုင်းလုပ်၊ လူကြည့်အောင်ပဲ ဘ၀ကြီးကို နေသွားမှာလား၊? ”
“ ငါ့ဘ၀ကို ပတ်ခြောက်ဝိုင်းလို သွားမှာလား၊ တကယ့် ဒိုးပတ်ဝိုင်းလို သွားမှာလား ? ” တကယ့်ဒိုး
ပတ်အစစ်က တီးရင်အသံမြည်တယ်၊ နားဆင်သူတိုင်း သာယာနာပျော်တယ်၊ တီးရင် စည်းကျဝါးကျ
ရှိတယ်၊ တီးရင် သူနဲ့ကိုယ် အပေးအယူ ရှိတယ်။ ပတ်ခြောက်ဝိုင်း ဆိုတာက ရွှိ.. လို့မှုတ်လိုက်ရင်
တီးပြမှုတ်ပြ၊ ရွှိ.. လို့ မှုတ်လိုက်တာနဲ့ ရပ်။ ခေါင်းဆောင်ကလဲ ဘယ်လိုတီးပါ ဘယ်လိုမှုတ်ပါလို့
သင်ထားတာမရှိ၊ သင်လဲ သင်စရာမရှိ၊ မသိတုံးကတော့ ဟေးလားဝါးလား ပါလိုက်တာပေါ့။
ပတ်ခြောက်ဝိုင်းဆိုတာကို နားလည်သဘောပေါက်ရင် ကိုယ့်ဘ၀ကို ပတ်ခြောက်ဝိုင်းလို
လုပ်မှာလား၊ လူတွေဝိုင်းကြည့်ရင် ပြီးရောလား ?။ လူ့အသိုင်းအ၀န်းမှာလဲ ပတ်ခြောက်ဝိုင်းလို
ရှိကြတာကိုး၊ ဟေး.. ဆိုတာနဲ့ လုပ်ကြရပြီ၊ ဟေး..ဆိုတာနဲ့ နားကြရပြီ၊ သွားဆိုတာနဲ့ သွားကြရပြီ၊
ရပ်ဆိုတာနဲ့ ရပ်ကြရပြီ။ ပတ်ခြောက်ဝိုင်းဆိုတာ လူကြည့်တာပဲ ရှိတယ် ဘာအသံမှ မထွက်တော့
ဘုန်းဘုန်းဘ၀မှာ ဘာအရသာမှ မရှိခဲ့ဘူး။
တကယ့် တီးဝိုင်းတစ်ခုဆိုတာ သူ့အသံ ကိုယ့်အသံ ညီရမယ်၊ အပေးအယူရှိရမယ်၊ စည်းကျ
ဝါးကျ ညီရမယ်၊ အဲဒီလို တစ်ယောက်အသံ တစ်ယောက်ကြား တစ်ယောက်နဲ့တစ်ယောက် အပေး
အယူ မျှနေရင် သာသာယာယာအသံနဲ့ တီးဝိုင်းတစ်ခု ဖြစ်လာပါတယ်။
အခုတော့ ပတ်ခြောက်ဝိုင်း
ကြီးက ရွှိ..ဆိုတာနဲ့ လုပ်၊ ရွှိ..ဆိုတာနဲ့ရပ်၊ ဒါလေးတစ်ခုပဲရှိတယ်၊ ဘယ်လိုတီးရမလဲ မသိ၊ ဘယ်လို
အပေးအယူ ရမလဲ နားမလည်၊ ကိုယ့်တူရိယာကလဲ အသံမထွက်၊ သူ့တူရိယာကလဲ အသံမထွက်၊
ကိုယ့်အသံ သူနားထောင်၊ သူ့အသံ ကိုယ်နားထောင် ဖို့ဆိုတာ ဘယ်လိုမှ မဖြစ်နိုင်။ အဲဒီမှာတင်စည်းရုံးမှုတို့၊ ညီညွတ်မှုတို့၊ အပေးအယူမျှတာတို့ ဘယ်တော့မှ မရနိုင်။
ဘယ်တော့မှ ငါ့အဖွဲ့အစည်းကိုတော့ ပတ်ခြောက်ဝိုင်းလို ၀ိုင်းအဖြစ် မခံနိုင်ဘူး။ ငါကိုယ်
တိုင်လဲ တီးတိုင်း တီးတိုင်း အသံမြည်တဲ့ တူရိယာပဲတီးမယ်။ တိုးတက်ကြီးပွား အောင်မြင်ဖို့ဆိုတာ
စည်းလုံးဖို့၊ ညီညွတ်ဖို့၊ အပေးအယူမျှတဖို့လိုတယ်၊ သူတော်ကောင်းတို့ တစ်တွေလဲ တကယ့်ဒိုး
ပတ်ဝိုင်းလို စည်းစည်းလုံးလုံးနဲ့ တိုးတက်ကြီးပွား အောင်မြင်ပြီး လိုရာခရီးသို့ လျောက်လှမ်းနိုင်
ကြပါစေ ကုန်သတည်း။ ။
မှတ်ချက်။ ။ပတ်ချာဝိုင်း=ပတ်ခြောက်ဝိုင်း (အသံမထွက်တဲ့ ဒိုးပတ်ဝိုင်း)
{ ရွှေ FM အစီအစဉ်ရဲ့ ဓမ္မဒူတအရှင်ဆေကိန္ဒ၏ ဘ၀ဖြောင့်ကြောင်း တစေ့တစောင်း
အပိုင်း( ၉၀) မှ ကောက်နုတ် ရေးသားပူဇော်ပါသည်။}
(မှားယွင်းမှုများရှိသော် သည်းခံခွင့်လွှတ်ပေးပါရန် ဦးခိုက်လျှောက်ထားပါသည် ဆရာတော် အရှင်သူမြတ်ဘုရား)
ဓမ္မနဒီ ဆိုဒ်မှ ပြန်လည်မျှဝေသည်။
No comments:
Post a Comment