ကျန်ခဲ့သည့် ရက်ပိုင်းက ကျွန်တော့် မေးလ် (E.mail)တွင် ဖော်ပြပါ စာတစ်စောင် ရောက်ရှိနေကြောင်းတွေ့ရှိရပါသည်။
ကျွန်တော် အပါအ၀င် "ပု မသိ၊ ပ မသိ" မိရိုးဖလာ ဗုဒ္ဓဘာသာဝင်အများစု ကား အဆန်းတကြယ် မဖြစ် ဖြစ်အောင် လုပ်ကြံ ပြောဆို ဖန်တီးလျက်ရှိကြပါ၏။
သို့သော် အဆန်းတကြယ် ဆိုတိုင်း အံ့သြကြည်ညိုဖွယ် မဟုတ်၊ မှန်ကန်သော အဆန်းတကြယ်ဖြစ်မှသာ အံသြ ကြည်ညိုဖွယ် ဖြစ်ပါ၏။
(သတိရမိတာလေးတစ်ခု ဖြတ်ပြောလိုက်ရပါဦးမည်။ လူအတော်များများက"ဘုမသိ၊ဘမသိ"..ဟု ပြောတတ်ကြပါသည်။
အမှန်က.."ပုည-ကုသိုလ် (ပု)"..မသိ၊
"ပါပ-အကုသိုလ်(ပ)"..မသိ " ဟု ဆိုလိုခြင်းဖြစ်ပါသဖြင့် "ပု..မသိ၊ပ..မသိ" ဟု ရေးမှသာလျှင်..အမှန်ဟု ပြောလို ပါသည်။ ထားပါတော့။)
စင်စစ် "ရဟန္တာ" ဆိုသည်မှာ ဓမ္မကိစ္စ မှတစ်ပါး အမှုကိစ္စ နည်းနိုင်သမျှ နည်းအောင်၊ ဖြစ်နိုင်လျှင် လုံးဝ မရှိအောင် ကျင့်ကြံ နေထိုင်သော ပုဂ္ဂိုလ် မြတ်မျိုးသာဖြစ်ပါ၏။ ၀င့်ဝါ ပါ့လွှားမှု မရှိ၊ ဂုဏ်ပြိုင်ဆိုင်မှု မရှိ၊ သိုသိပ်လွန်းသော ပုဂ္ဂိုလ်မြတ်မျိုးသာဖြစ်ပေသည်။
ထေရ၀ါဒသာသနာတော်နှင့်ကြုံကြိုက်တုန်းကာလလေးတွင်
"ရဟန္တာပုဂ္ဂိုလ်"တစ်ပါးလောက်ဖြစ်ဖြစ် ဖူးချင်လှသည့် ချင်ခြင်း တပ်နေသည်မှာကြာလှပါပြီ။
"ကိလေသာထူပြော၊တဏှာတောမှာ နေ,နေ တဲ့ အသင်မင်းကြီး လို ပုထုဇဉ်အနေနဲ့
ရဟန္တာ မှန်း ဘယ်လိုလုပ်သိနိုင်မှာလဲ" ဟူသော (ကောသလသံယုတ်၊သတ္တဇဋိလသုတ်)စကားတော်ကို ကျွန်တော်ကြား ဖူးသည်။ "ကောသလမင်းကြီး" ကို" ဗုဒ္ဓမြတ်စွာဘုရားရှင်" ကိုယ်တော်တိုင်မိန့်ကြားဖူးထားသည့် စကားတော်။
ထို စာလေးကိုဖတ်ပြီးပြီးခြင်း အားငယ်လိုက်ရသည် ဖြစ်ခြင်း။
ဟုတ်ပါ့။
မြန်မာနိုင်ငံ ၊ ထေရ၀ါဒ ဗုဒ္ဓ သာသနာ့ သမိုင်းတစ်လျှောက်တွင် အောက်ပါ ရဟန်းသံဃာတော်ကြီးများ ပေါ်ထွန်းခဲ့ဖူးပါသည်။
"ထွဋ်ခေါင်ဆရာတော်(၁၁၆၀-၁၂၄၂)"
"ဘုန်းတော်ကြီး ဦးသီလ(၁၁၉၄-၁၂၆၉)"
"လယ်တီ ဆရာတော်(၁၂၀၈-၁၂၈၅)"
"သက္ချတောင်ဆရာတော်(၁၂၃၃-၁၂၉၄)"
"မိုးညှင်းဆရာတော်(၁၂၃၄-၁၃၂၆)"
"သထုံ ဇေတ၀န်ဆရာတော်(၁၂၃၁-၁၃၁၆)"
"စွန်းလွန်းဆရာတော်(၁၂၃၉-၁၃၁၄)"
"ကန္နီ ဆရာတော်(၁၂၄၁-၁၃၂၈)"
"ဝေဘူ ဆရာတော်(၁၂၅၇-၁၃၃၉)"
"မိုးကုတ်ဆရာတော်(၁၂၆၁-၁၃၂၄)"
"မဟာစည်ဆရာတော်(၁၂၆၆-၁၃၄၄)"
တစ်ပါးမှ ကျွန်တော် မမီလိုက်ပါ။ ၀မ်းနည်းဖွယ်ကောင်းလေစွ။
ထို့ကြောင့် "ရဟန္တာ" ကို "ရဟန္တာ" မှန်း အတပ် အမှန်သိရှိရေး သည် ကျွန်တော် တို့အတွက် အခက်အခဲရှိပေသည်။ ခဲယဉ်းပေသည်။
ထိုသို့သော အကြောင်းကို မိတ်ဆွေ ကိုဇော်ဝင်းနိုင် နှင့် အလားတူ ဓမ္မမိတ်ဆွေများစဉ်းစားချင့်ချိန် သိရှိနိုင်စေရန် ကျွန်တော် လက်လှမ်းမီသရွေ့ ရှာဖွေ တင်ပြပါမည်။
ရဟန္တာ အမျိုးမျိုး
"အထုံ,၀ါသနာ,စရိုက်" မှ အပ "ကိလေသာ အာသဝေါတရား" အားလုံးမှ ကင်းပ သန့်စင် အညစ်အကြေးမတင်သော ပုဂ္ဂိုလ်မြတ်မျိုးကို ရဟန္တာ ဟု ခေါ်ပါ၏။
"ရဟန္တာပုဂ္ဂိုလ်မြတ်" သည် ဆည်းပူးအပ်သော ပါရမီ၊ ပန် ဖူးသော ဆု ၊ အနုအရင့် ကုသိုလ်အားလျော်စွာ အကျဉ်း အားဖြင့်
(၁) "သုက္ခ ၀ိပဿက ရဟန္တာ" နှင့်
(၂) "ဆဋ္ဌာဘိညာ၊ပဋိသမ္ဘိဒါပတ္တ ရဟန္တာ"
ဟူ၍ နှစ်မျိုး ရှိပါ၏။
(၁) "သုက္ခ ၀ိပဿက ရဟန္တာ" ဟူသည်က "ရဟန္တာ" ဖြစ်သော်လည်း "ဈာန် အဘိညာဉ်" ကို မရ။ "ပဋိသမ္ဘိဒါဉာဏ်(ထိုးထိုးထွင်းထွင်းသိမှု)(၄)ပါး" သို့ မရောက်။ ရဟန္တာ ပုဂ္ဂိုလ် ၏ ဂုဏ်အင်္ဂါ များ ပြည့်စုံ ရုံမျှ ရှိသော ရဟန္တာ မျိုး ဖြစ်ပါ၏။
(၂) "ဆဋ္ဌာဘိညာ၊ပဋိသမ္ဘိဒါပတ္တ ရဟန္တာ" ဟူသည်က "အဘိညာဉ်(၆)ပါး"ရရှိပြီး "ပဋိသမ္ဘိဒါဉာဏ်(၄)ပါး" နှင့်ပြည့်စုံသော ရဟန္တာ မျိုး ဖြစ်သည်။
ထို မှတစ်ပါး-
(၁)သဒ္ဓါ ၀ိမုတ္တိ ရဟန္တာ- သဒ္ဓါ ဖြင့် လွန်မြောက်သူ
(၂)ပညာ ၀ိမုတ္တ ရဟန္တာ- ပညာ ဖြင့် လွန်မြောက်သူ
(၃)ဥဘတော ဘာဂ ၀ိမုတ္တ ရဟန္တာ- ရုပ်၊နာမ် အဖို့ နှစ်ပါးဖြင့် လွန်မြောက်သူ
(၄)တေ၀ိဇ္ဇပတ္တ ရဟန္တာ- ၀ိဇ္ဇာ သုံးပါး ရသူ
(၅)ဆဠာဘိညာ ရဟန္တာ- အဘိညာဉ် ခြောက်ပါး ရ သူ
(၆)ပဋိသမ္ဘိဒါပတ္တ ရဟန္တာ- ပဋိသမ္ဘိဒါဉာဏ် လေးပါး ရောက် သူ
ဟူ၍လည်း ရဟန္တာ(၆)မျိုး ရှိပြန်ပါ၏။
ထို့ပြင်-
(၁)ပါရမီ ပတ္တ ရဟန္တာ
(၂) ပဋိသမ္ဘိဒါပတ္တ ရဟန္တာ
(၃) ဆဠာဘိညာ ရဟန္တာ
(၄) တေ၀ိဇ္ဇပတ္တ ရဟန္တာ
(၅) သုက္ခ ၀ိပဿက ရဟန္တာ
ဟူ၍လည်း အစီအစဉ် တစ်မျိုး ရှိပါသည်။
ထူးခြားသော ရဟန္တာ တစ်မျိုး မှာကား "သမသီသီ ရဟန္တာ"ဖြစ်ပါ၏။
"သမသီသီ" ဆိုသည်က "၀ဋ်ဦးခေါင်း" ခေါ် "အသက်" ကြွေသည်နှင့် ကိလေသာ ဦးခေါင်း ခေါ် "အ၀ိဇ္ဇာ" လည်း တစ်ပြိုင်နက်တည်း ကြွေသော ရဟန္တာမျိုး ဖြစ်သည်။
ဆိုလိုသည် က "ရဟန္တာ"လည်းဖြစ် အသက် လည်းကုန်၊ တစ်ခါတည်း နှစ်ကိစ္စ ပြီးစီးသွားသည်ကို ဆိုလိုပါသည်။
ရဟန္တာ မှန်းသိနိုင်သလား
ယင်း ရဟန္တာ ကြီးများကို ကျွန်တော် တို့အနေဖြင့် မြင်ရုံမျှဖြင့် ရဟန္တာမှန်း သိနိုင်ပါမည်လား။ အလွန် ခဲယဉ်းမည်ထင်ပါသည်။
အကယ်၍ သိနိုင်သည် ဆိုလျှင် ထို အသိ မှာ မှန်းဆအသိ၊ ရိပ်မိအသိ မျိုးသာဖြစ်နိုင်ပါမည်။ တကယ် အသိ၊ တစ်တစ်ခွခွ အသိ မျိုး မဖြစ်နိုင်ပေ။
လူသာမန်ကို ထားဘိဦး၊ အောက်အဆင့်ရှိ အရိယာအချို့ကိုယ်တိုင်ပင် မိမိ အရိယာဖြစ်နေကြောင်း ကိုမသိသည်ပင် ရှိသည်ဟုဆိုပါသည်။
"လယ်တီဆရာတော်ဘုရားကြီး"က (၀ိပဿနာ ဒီပနီ) တွင် ဤသို့ မိန့်ဆိုထားပါသည်။
"မဂ်ဉာဏ်၊ဖိုလ်ဉာဏ် သို့ပေါက်ရောက်မှု မည်သည် အမှန်အားဖြင့် အလွန်သိနိုင်ခဲ၏။ အဘယ်ကြောင့်နည်း ဟူမူ ကိလေသာ တို့၏ အနုသယ အခိုက်အတန့် နက်နဲလှသောကြောင့်တည်း။"ဟူ၍ဖြစ်ပါ၏။
လောင်းလုံမြို့၊မင်းရပ်ရွာ၊တလိုင်းမော် ဆရာတော်ဘုရားကြီး(၁၂၁၄-၁၂၉၆) ရေးသားစီရင်တော်မူသော (၀ိပဿနာ ကမ္မဋ္ဌာန်း၊နိဗ္ဗာန်လမ်းပြကျမ်း) ကျမ်းတွင်-
"အချို့သော ပုဂ္ဂိုလ် တို့မှာ နေ့ည မပြတ် တရစပ် ၀ိပဿနာ ကို အားထုတ်၍နေသည့်အတွက် မဂ်ဖိုလ်အနီးအပါး ဥပစာရ ကာမာဝစရ သမာဓိ တရား ကို ရကြပေသည်။၎င်း ပုဂ္ဂိုလ် တို့သည် မိမိတို့က ၀ိပဿနာ ကို မပြတ်အားထုတ်နေသည့်အတွက် ၀ိပဿနာဇော တို့ ဆက်ကာ ဆက်ကာ အနန္တရ၊သမနန္တရ၊နတ္ထိ၊၀ိဂတ၊အာသေ၀န၊ဥပနိဿယ၊ပစ္စည်းအားကြီးစွာ တပ်၍ တဒင်္ဂပဟာန် အားဖြင့် လောဘ၊ဒေါသ၊မောဟ စသော ကိလေသာ တို့ကို ပယ်ရှားနေသည့်အတွက်(ငါသည် မဂ် ရပြီ။ဖိုလ် ရပြီ) ဟု ထင်မှတ်နေတတ်သည်။" ဟု ရှင်းလင်းဖော်ပြထားဖူးပါသည်။
ဤသို့အားဖြင့် အောက်အဆင့် ရှိ ပုဂ္ဂိုလ်များ၌ အမှန်သိရေးအတွက် ပြဿနာ ရှိသေးသည် ဆိုပါလျှင် ထိပ်တန်းရောက် ရဟန္တာ အရှင်သူမြတ်ကြီးများအပေါ် မြင်ရုံမျှဖြင့် ရဟန္တာ မှန်း သိနိုင်ဖို့မှာ စဉ်းစားစရာပင် မရှိပါချေ။
"အနာဂါမ်" ဖြစ်နေသော "၀ိသာခ"သူဋ္ဌေးကြီး သည် မိမိ၏ ဇနီးချော "ဓမ္မဒိန္နာ"ဘိက္ခုနီမ မှာ "ရဟန္တာ"အဖြစ် သို့ရောက်နေသည်ကို မြင်ရုံ နှင့်မသိ။ သာသနာတော်၌ မပျော်ပိုက်၍ အိမ်သို့ ပြန်ပြေးခဲ့ပုံရကြောင်း ပထမ အထင်မှားခဲ့သေး၏။ နောက် တရား ဆွေးနွေးကြည့်ပြီးသော အခါမှ "ရဟန္တာ"မှန်း ရိပ်မိ သိရှိခဲ့ပေသည်။
"ဇေတ၀န်ကျောင်းတော်"သို့ ဘုရားဖူးရန် ရောက်ရှိလာကြသော ဇနပုဒ်ရဟန်းတော်များက စင်္ကြံ သွားလျက်အားထုတ်နေသော မျက်မမြင်"စက္ခုပါလ မထေရ်ကြီး" နင်းမိ၍ သေနေသည့် ပိုးကောင် လေးများကိုကြည့်ကာ ကဲ့ရဲ့ ရှုတ်ချမိသည်မှာလည်း ထို မထေရ်ကြီး"ရဟန္တာ"ဖြစ်နေမှန်း မြင်ရုံ နှင့် မသိသောကြောင့်ဖြစ်ပါ၏။
ဤသည်မှာ ကျွန်တော် တို့လို တဏှာတောဝယ် ချာချာလည်မျောနေကြသည့် ပုထုဇဉ် တို့ကို မဆိုထားဘိ။
ပရစိတ္တ၀ိဇာနာန အဘိဉာဏ် နှင့် ဒိဗ္ဗစက္ခု အဘိဉာဏ် တို့ကို ရရှိထားခြင်း မရှိသော အောက်အရိယာများ က ထိပ်တန်း ရောက် ရဟန္တာ ပုဂ္ဂိုလ်မြတ်ကြီးများကို ရဟန္တာ ဟုတ်သည်-မဟုတ်သည် မသိနိုင်ပုံ အထောက်အထားအချို့ဖြစ်ပါသည်။
ကျွန်တော် တို့ လူသာမန်များအနေဖြင့်ဆိုသော် အစစ်အမှန် ရဟန္တာ များကို ရဟန္တာမှန်း မသိ၍ မကြည်ညို မိပဲ-
ဟန်ဆောင်လှည့်ပတ်နေ သော အတုအယောင်ရဟန္တာ ဆိုသည်များကို အကြည်ညို မမှားမိရန်သာ သတိရှိစေလိုပါသည်။
ချမ်းသာကြပါစေ..၊အေးငြိမ်းကြပါစေ..၊
သံသရာဝဋ်ဆင်းရဲမှ..လွတ်မြောက်နိုင်ကြပါစေ။
ဘ၀တုသဗ္ဗမင်္ဂလံ
ဥာဏ်လင်းမြို့
ဗုဒ္ဓကမ္ဘာ ဆိုဒ်မှ ပြန်လည်မျှဝေသည်။
No comments:
Post a Comment