(၆)ကြိမ်မြောက်"နိုင်ငံတော်သံဃာ့မဟာနာယကအဖွဲ့" အစည်းဝေးပွဲကြီးကို
"ရန်ကုန်မြို့"တွင်
လွန်ခဲ့သော"၂၀၀၈ခုနှစ်၊နိုဝင်ဘာလ၊[၂၂]ရက်နေ့"ကပြုလုပ်ကျင်းပ
ခဲ့ကြောင်း၂၃ရက်နေ့ထုတ်သတင်းစာထဲ
မှာပါရှိပါသည်။ထိုအစည်းအဝေးတွင်
ဥက္ကဌဖြစ်တော်မူသော"မကွေးဆရာတော်ဘုရားကြီး"၏ "သရဏီရသြ၀ါဒကထာ"မှာ
မှတ်သားဖွယ်ရာကောင်းလှပါ၏။
"ဆရာတော်အရှင်မြတ်တို့ဘုရား။
ယခုသာသနာတော်နောက်ပိုင်း အချိန်အခါ၌ "အဓမ္မ"ကို "ဓမ္မ"ဟုပြခြင်း စသည်ဖြင့် လူအများ စီးပွားချမ်းသာမဲ့ခြင်း၊ အကျိုးမဲ့ခြင်း၊ နတ်လူတို့ အစီးအပွားမဲ့ခြင်း၊ ဆင်းရဲခြင်းငှာ ကျင့်ကြကုန်သည်ဖြစ်၍ များစွာသော "အကုသိုလ်"ကို ဖြစ်ပွားစေကြကာ သာသနာတော်ကြီး ကွယ်ပျောက်အောင်ပြု လုပ်နေကြသည့် ရဟန်း၊ သာမဏေများ ပေါ်ပေါက်နေကြသည်ကို ကြားသိကြရပါသည်ဘုရား။
အချို့ရဟန်းများက လည်း ထေရ၀ါဒဗုဒ္ဓသာသနာတော် မှေးမှိန် ကွယ်ပျောက်၍ မဟာယာနသာသနာဖြစ်ပေါ်အောင် လုပ်ဆောင်နေကြ သည်ကိုလည်း ကြားသိနေရပါသည် ဘုရား။"
စသဖြင့် လျှောက်ထားခဲ့ပါသည်။
"လောကတွင် မြတ်နိုးမှုမရှိလျှင် ပျောက်ဆုံးတတ်ခြင်းသည် သဘာဝပင်ဖြစ်ပါ၏။ လူတိုင်း တန်ဖိုးရှိသော"ရတနာ"များကို အမြတ်တနိုး တန်ဖိုး ထားတတ်ကြသော်လည်း တန်ဖိုးမရှိသော "ကျောက်"များကိုတော့ လမ်းဆင်းလျှောက်ဖို့၊ "လမ်းခင်း ကျောက်"လုပ်ပစ်တတ်ကြပါသည်။
"မြတ်စွာဘုရားရှင်"ကလည်း-
"လောကမှာ တရားစစ်၊ တရားမှန်ဖြစ်သော "ဓမ္မ"ကို၊ တရားစစ်၊ တရားမှန် မဟုတ်သော၊ "အဓမ္မ"ဟု လုပ်ကြလျှင်၊ ၀ိနည်းစစ်၊ ၀ိနည်းမှန်ဖြစ်တဲ့ "၀ိနယ"ကို၊ ၀ိနည်းစစ်၊ ၀ိနည်းမှန်မဟုတ်တဲ့ "အ၀ိနယ"ဟု လုပ်နေကြပြီဆိုလျှင်၊ မြတ်စွာ ဘုရားရှင် "မဟောပြောအပ်၊ မဟောပြောခဲ့သည်" များကို၊ "ဟောပြောအပ်၊ ဟောပြောခဲ့သည်"ဟုဆိုကုန်ကြလျှင်၊ မြတ်စွာ ဘုရားရှင် "ဟောပြောအပ်၊ ဟောပြောခဲ့သည်" များကို၊ "မဟောပြောအပ်၊ မဟောပြောခဲ့ပါဘူး"ဟု ဆိုကုန်ကြလျှင်၊။ပ။ ဒီသာသနာ တော်ကြီးကွယ်ပလိမ့်မယ် "ဟု ဟောကြားတော်မူခဲ့ပါသည်။(အံ၊ ၁၊ ၁၈-၁၉)။
ထို အကြောင်းများ ကြားရ၊ မြင်ရသည်မှာသာသနာအတွက်ရင်လေးစရာတွေပါဟု
ယူသော်ရပါသည်။
ဆရာတော်ကြီးများကသတိတရားရှိရှိ၊အမျိုးချစ်စိတ်၊
ဘာသာသာသနာချစ်စိတ်ရှိရှိဖြင့်အများကောင်းကျိုး၊နတ်လူဗြဟ္မာ
သတ္တ၀ါတို့ကောင်းကျိုးကိုရှေ့ရှု၍"အဓမ္မတရား"
တွေပပျောက်အောင်ဆောင်ရွက်နေချိန်တွင်ပစ္စည်းလေးပါး
ထောက်ပံ့လှူဒါန်းမှု
ပြုနေကြသောဒကာ၊ ဒကာမတွေဘက်မှလည်း သတိတရားရှိရှိဖြင့် "သာသနာဖျက်လုပ်ငန်း"များကို တွန်းလှန်သင့်ပါသည်။
ထိုမှသာလျှင်ဗုဒ္ဓသာသနာတော်ကြီးအဓွန့်ရှည်တည်တံ့မှာဖြစ်ပါသည်။
"အဓမ္မ"များကိုတွန်းလှန်ရန်ဆိုသည်က"ဓမ္မ"များကိုဦးစွာ သိထားမှ ဖြစ်ပါလိမ့်မည်။
"ဓမ္မ"ကို "ဓမ္မ"မှန်းမသိသောအခါ "အဓမ္မ"နှင့် "ဓမ္မ"ကိုမှားပြီး ကျင့်နေတတ်ပါသည်။ အတု ဆိုသည်က အစစ်ကို ပုံစံယူ၍ ဆင်တုအောင်လုပ်ထားတဲ့အရာပဲ ဖြစ်သည်ဟု
ပြောလို့ရမည်ထင်ပါသည်။
ထို့ကြောင့် "အဓမ္မ"ဟုဆိုလိုက်တိုင်း "ဓမ္မနှင့် လုံးဝမတူတဲ့အရာ" ဟုတော့ လုံးဝမထင်လိုက်ပါနှင့်။
ခပ်ဆင်ဆင်လေး တူပါသည်။
ဆင်တူယိုးမှားရှိပါသည်။ သတိပြုကြပါ။
နောပေတဲ့ ယခုအချိန်တွင်မတော့ ဗေဒင်၊ အင်း၊ အိုင်၊ မန္တရား၊ နက္ခတ်၊ ပြဿဒါး၊ ရက်ရာဇာများကဗုဒ္ဓဘာသာဝင်အချို့ကို အနိုင်ယူ နေကြသည်မှာ အားလုံးအမြင်ပင်ဖြစ်ပါ၏။
ဗေဒင်ဆရာမှ ခိုင်းလိုက်လျှင် ဘာမဆိုလုပ်ပါ၏။ ဗေဒင်ပညာရပ်ဆိုသည်မှာ " မြတ်စွာဘုရားရှင် မပွင့်ပေါ်ခင်ကတည်းက တည်ရှိခဲ့တဲ့ပညာတစ်ခုပါပဲ" ဟု အချို့သောသူတို့က ဆင်ခြေပေးတတ်ကြပါသည်။
မြတ်ဗုဒ္ဓလောင်းလျာကို ဧကန် စင်စစ်ဘုရားဖြစ်မည်ဟုဟောခဲ့ခြင်းမှာ အထင်အရှားရှိနေပါသည်ဟု ပြောဆိုချက်ကိုလည်း လက်ခံပါသည်။
နော့ပေတဲ့ တစ်ဖက်ကကြည့်သောအခါတွင်အလောင်းတော်ကိုဧကန်
စင်စစ်ဘုရားဖြစ်မယ်ပြောခဲ့တဲ့သူများမှာဘုရား
အလောင်းတော်က အစာအာဟာရ ပြန်လည်မှီဝဲ၍ တရားကျင့်သော အခါမှတော့
"အပြင်း အထန်ကျင့်တုန်းကတောင် ဘုရားမဖြစ်နိုင်တာ၊ခုလိုအစားအစာတွေပြန်လည်စားသောက်
ပြီးကျင့်လို့ကတော့ဖြစ်လာမှာမဟုတ်တော့ဘူး"ဆို၍စွန့်ခွာ
သွားခဲ့ကြပုံမှာ လည်း သူရို့ ဗေဒင်ပညာကို သူရို့ကိုယ်တိုင်က မယုံကြဘူးဆိုသည် ကို သက်သေထူလို့ရပါသည်။
ပညာရပ်အနေဖြင့် လက်ခံလို့ရပါ၏။သို့သော် အားကိုးထိုက်သော အရာမဟုတ်ဆိုသည်ကိုတော့ သိထားသင့်ပါသည်။
ယခု ဖြစ်နေသည်က မကောင်းတဲ့ အဖြစ်ဆိုးများ တစ်ခုခုကြုံရပြီဟေ့ဆိုသည်နှင့် ကိုယ့်ပြုခဲ့သော အတိတ်ကံကို ပစ်ပယ်၍ ဗေဒင်ဆရာဆီ ပြေးတတ်တဲ့အကျင့်များက လူတော်တော်များများတွင် ဖျောက်မရအောင်ဖြစ်နေတတ်ပါသည်။
သူရို့တွေက ဘုရား ထံတွင် ဗေဒင် မှ ပြောသည့် အတိုင်း အမွှေးနံ့ သာတိုင်တွေထွန်း၊ ပန်းတွေ၊ ရေချမ်းများကပ်ပါ၏၊
တရားတော်များကို လည်း ဂါထာ၊ မန္တန်များ ဖွဲ့ ၊ သံဃာတော်များကိုလည်း ဟိုဟာပင့်ရွက်ခိုင်း၊ ဒီဟာပင့်ရွတ်ခိုင်းနှင့်၊ ဘာနေ့သား ဆရာတော်ကို ဘာကပ်ပြီးတဲ့အခါမှာ၊ ဘယ်နေ့နံဘုရားမှာ၊ ဘယ်ထောင့် ကနေပြီးတော့၊ ဘာဂါထာကို ရွတ်ရမယ်ဆိုတာတွေနှင့် ရတနာသုံးပါလုံးကို အသုံးချစရာတစ်ခုအနေဖြင့် လုပ်ဆောင်နေကြခြင်းသည် ယနေ့နိုင်ငံ၏ မြင်ကွင်းတစ်ခုဖြစ်နေလေပြီ။
အထက်တွင်ဆိုခဲ့သလို တန်ဖိုးရှိသည့် ရတနာ ကို တန်ဖိုးမသိသော အခါ လမ်းဆင်း လျှောက်ဖို့ လမ်းခင်းကျောက် လုပ်ပစ်လိုက်ခြင်းသည် အလွန်မိုက်မဲတဲ့သူများဟု ပြောလျှင်ရမည်ထင်ပါသည်။
အလှူလုပ်တာကောင်းပါသည်။
သို့သော် ဗေဒင်ဆရာ တိုက်တွန်းလို့လုပ်ခြင်း မဟုတ်ပဲ ကြည်ညိုသဒ္ဓါတရားနှင့် လုပ်သော အလှူက မွန်မြတ်သန့်စင်ပါသည်။ ဗေဒင် ကတစ်ဆင့်လာသော အလှူသည် မလျော်ကန်သော တိုက်တွန်းမှုများ ပါနေသည့်အတွက် မမြတ်ပါ။
ထို့အပြင် မိမိ အစီအရင် မအောင်မြင်ခဲ့လျှင်၊ "လှူသာလှူနေရတယ်၊ ဘာမှဖြစ်မလာဘူး"ဟုဖြစ်လာသောအခါ ဖြစ်လာတဲ့အခါ ဘုရား၊ တရား၊ သံဃာအပေါ်မှာ ယုံကြည်မှုသဒ္ဓါတရားသည် တစ်ဖြည်းဖြည်း အားနည်းလာတတ်ပါသည်။ ယုံကြည်မှုကျ ဆင်းလာရာမှ လက်မခံနိုင်တော့သည့် အခြေအနေ အထိကို ထိုးဆင်းသွားနိုင်ပါသည်။
ထို့ ကြောင့် ဗေဒင်ပညာ အစရှိသော အရာများသည် သာသနာကို တိုက်ရိုက်ကြီး ကွယ်အောင် မလုပ်သော်လည်း တစ်ဖြည်းဖြည်းချင်း ဖြိုလှဲနေ သည် ဆိုခြင်းကို သိထား၊သတိထားသင့်ပါသည်။
သူသည်လည်း ဓမ္မနှင့် ဆင်တူသော အဓမ္မသာ ဖြစ်ပါသည်။ ထိုအဓမ္မကို ပြုနေသမျှ သာသနာ ကွယ်ရပါလိမ့်မည်။
ရတနာသုံးပါးနဲ့ ကံ၊ ကံ၏အကျိုးကို ယုံကြည်ခြင်း မရှိတဲ့သူအတွက်ကတော့-
"သတ္တ၀ါတစ်ယောက်၊
ယူမှားမှောက်ကို၊
သိန်းလောက်ဘုရား၊
လှန်သောအားဖြင့်၊
ဟောကြားချေချွတ်၊
ဖြေမလွတ်ဘူး"
ရှေး စာပေကျမ်းဂန်များ က ဆိုသောကြောင့် ထိုသူမျိုးတို့ကိုတော့ မပြောလိုပါ။
တစ်ကယ်အစစ်အမှန် သာသနာကို ချစ်တဲ့သူများ အတွက်သာ တင်ပြလိုပါသည်။
"၀ိနယ"ဒေသနာ သည် "သာသနာ"။
"မဂ္ဂင်ရှစ်ဖြာ" သည် "သာသနာ"။
"သိက္ခာသုံးပါး" သည် "သာသနာ"။
"ဗောဓိပက္ခယတရား[၃၇] ပါး" သည် "သာသနာ"။
"ဘုရားအဆုံးအမတော်"တွေ သည် "သာသနာ"။
ဤသို့ဆိုလျှင် "သာသနာပြုတယ်"ဆိုသည်မှာ မြတ်စွာဘုရားရှင်
ဟောကြားတော်မူသည့် အတိုင်း လိုက်နာ၊ ပြုမူ၊နေထိုင်ခြင်းသည် "သာသနာပြု"ခြင်းဖြစ်ပါသည်။
"၀ိနည်း"ကိုလိုက်နာခြင်းသည် လည်း၊ "သီလတရား"ကို စောင့်ထိန်း ခြင်းဖြစ်၍ "သာသနာ ပြုခြင်း"ဖြစ်ပါ၏။
"ကမ္မဋ္ဌာန်း (၄၀)" မှတစ်ခုခုကို ပွားများ နေခြင်းသည် "သမထ"အားထုတ် နေခြင်းဖြစ်၍ "သမာဓိတရား"ကိုဖြည့်စွမ်းနေသောကြောင့်
"သာသနာပြုတယ်"ခေါ်ပါသည်။
"မဂ္ဂင်တရား"တွေ၊ "ဗောဓိပက္ခယတရား"တွေအားထုတ်နေခြင်းသည် ပညာတရား တိုးပွားစေခြင်းငှာဖြစ်သောကြောင့် "သာသနာပြုခြင်း" ပင်ဖြစ်ပါသည်။
ဤသို့ဆိုလျှင်ဖြင့် အခြေခံ(၅) ပါးသီလကစ၍ သီလတရားကို စောင့်ထိန်းခြင်းမရှိခြင်းသည် သာသနာပျက်စီးစေနိုင်ပါသည် ဟု ပြောလျှင် လွန်ရာများကျနေတော့မလား။သမထ ဘာဝနာ မပွားများပဲနေခြင်းသည် သာသနာကို ပျက်စီးစေပါသည်။
ပညာတရားတို့ပွားအောင် ၀ိပဿနာအလုပ်မလုပ်ခြင်းသည် သာသနာကို ပျက်စီးစေပါသည်။ မိမိမလုပ်သည့် အတွက် မိမိအကျိုးမရသည့်အပြင် သာသ နာကိုပါ အရှည်တည်တံ့အောင် မစောင့်ထိန်းရာရောက်ပါသည်။
မြတ်စွာဘုရားရှင်က -
တရားမနာခြင်း၊ တရားစာပေများ လေ့လာသင်ယူမှုမရှိခြင်း၊
နှုတ်တက်အာဂုံဆောင်ထားနိုင်စွမ်းမရှိခြင်း၊ ဆောင်ထား သမျှတွေကို မှတ်မှတ်သားသားမရှိခြင်း၊ ပဋိပတ္တိလုပ်ငန်းကို အားထုတ်လုပ်ကိုင်ခြင်း မရှိခြင်းတွေသည် သာသနာကွယ် ကြောင်းတွေပါလို့ အတိအလင်းဟောကြားတော် မူခဲ့ပါသည်။
ဤသည်များကို သိသင့်ပါသည်။ ဗုဒ္ဓဘာသာဝင် တစ်ယောက်အနေဖြင့် ကိုယ့်အမျိုးဘာသာ၊ သာသနာကို ချစ်မြတ်နိုးတတ်ဖို့၊ လေးစား တန်ဖိုးထားတတ်ဖို့ အဓိက ပြောလိုရင်းဖြစ်ပါသည်။
သာသနာတော်ကြီးသည် နှစ်ပေါင်း ၂၅၀၀ ကျော်ခရီးကို ဖြတ်သန်းလာခဲ့ရသောအခါတွင် သာသနာတွင်းကို ထိုးနှက်ချက် တွေများလွန်းသဖြင့် ဒါဏ်ရာများ ဗလပွဖြစ်နေပါပြီ။သာသနာကို မပြို ပြိုအောင်ဖြိုချင်နေတဲ့သူများ ကလည်း တစ်ပုံ တစ်ပင်။ ထိုအထဲကိုယ်မပါရင်တော်လှပြီမှတ်ရပါမည်။
နော့ပေတဲ့ မည်သူတွေဘယ်လောက်ပဲဖြိုဖြို၊ ဘယ်လာက်ပဲတွန်းလှန် တွန်းလှန်၊ ဘယ်ဝါဒတွေ ဘယ်လောက်ပဲကြီးစိုး ကြီးစိုး အင်ကြင်းတောမှာ မွေး၊ အင်ကြင်းတောမှာ ပရိနိဗ္ဗာန်စံ၊ အင်ကြင်းတို့ရဲ့ သစ္စာတရားသည် ဘယ်တော့မှပျောက်ကွယ်မှေးမှိန်ခြင်းမရှိဘဲ၊ ပတ္တမြားစင်စစ် နွံမနစ်သည့်သန့်စင်မွန်မြတ် ခိုင်မာလျက်ရှိသည်သာရှိပါသည်။
သီလသိက္ခာ၊ သမာဓိသိက္ခာ၊ ပညာသိက္ခာများသည် ကျောက်စိုင်၊ ကျောက်သားတွေလို ကြံ့ကြံ့ခံနိုင်နေသည်မှာ သာသနာပဲဖြစ်သည် ဆိုခြင်း ကိုတော့ အပြည့်အ၀ ယုံကြည်ပါသည် ။
တစ်ကယ်တမ်း ပြောရလျှင် သာသနာ ကို ချစ်တတ်ဖို့ပဲလိုတာသည်။ ချစ်တတ်မှ မြင့်မြတ်တာကိုရှာမှာဖြစ်ပါသည်။ မှန်ကန်တာ ကိုရှာမှာဖြစ်ပါသည်။မြတ်နိုးမှ တန်ဖိုးထားကြမှာဖြစ်ပါသည်။
မချစ်တတ်၊ မမြတ်နိုးတတ်တဲ့အခါ သာသနာကို အလွဲလိုက်၊ အမြဲမိုက် နေခဲ့ကြသဖြင့် လွဲသူတို့သွား၊ မိုက်သူတို့သွားသည့် အပယ်ဆင်းရဲတွင် မြဲမြံစွာခံနေခဲ့ရခြင်း ကို
ဂင်္ဂါဝါဠု သဲစုမက ပွင့်ခဲ့ကြသော ဘုရားအဆူဆူနဲ့လွဲပြီးလျှင်
ဒုက္ခသက်ရှည် ယခု ဒုက္ခခန္ဓာ လွယ်ထားရသည် ကို သုံးသပ်ထောက်ရှူ ၍ နားလည်သင့်ပါသတည်း။
ချမ်းသာကြပါစေ..၊အေးငြိမ်းကြပါစေ..၊
သံသရာဝဋ်ဆင်းရဲမှ..လွတ်မြောက်နိုင်ကြပါစေ။
ဘ၀တုသဗ္ဗမင်္ဂလံ
ဉာဏ်လင်းမြို့ ရေးသားသောပို့မှ ပြန်လည်မျှဝေသည်။
No comments:
Post a Comment